Eptu pawl Congress leh party dangte chuan Justice Gogoi hi an deu nasa hle a, Rajya Sabha member ni tura ruat a ni chu India democracy kalphung nena inhmeh lo a ni an ti. Justice Gogoi-a lakluh lai hian eptu pawl zinga Samajwadi Party mite tih loh chuan lungawi lohna an lantir vek a, Law Minister, Ravi Shankar Prasad chuan hmun inang lo tak tak a\angin mi hmingthang tak tak Rajya Sabha-ah an fuankhawm a, chung zingah chuan Chief Justice hlui pawh chu an zinga pakhat ni turin a tel ve a, a theihna zawng zawng parliament tan a hlan dawn a ni tiin a thlavang a hauhsak a ni.
Vice President, Rajya Sabha Chairperson M Venkaiah Naidu chuan Rajya Sabha member ni tura inruatnaah dan leh hrai zawm a awm tih sawiin, eptu pawlte chet dan chu thil mawi tak a nih loh thu a sawi bawk.
Justice Gogoi hian Chief Justice of India a nih lai khan ram buai tam tak a lo rem tawh a, chung zingah chuan Ayodhya buaina pawh a tel a ni.
Congress chuan Justice Gogoi-a Rajya Sabha member ni tura ruatna chu thil la thleng zen zen lo, ngawih bo pui mai chi ni lo leh sual ngaihdam theih loh ang hial a ni an ti a, India ram danpui innghahna bul chu Judiciary, Legislature leh Executive ten thuneihna hrang an neih dan fel takah a ninnghat a ni an ti a, sorkar chuan India ram rorelna kalphung a ti hnawk a ni an ti.
Supreme Court Justice hlui, Kurian Joseph chuan a thawhpui hlui, Gogoi-a thutlukna chu na takin a dem a, a thutlukna chuan Dan rorelna-a mipuiten rinna an nghah ngamna a tihchhiat a rin thu a sawi a ni.
