Ruahsur nasa avanga Mizoram hmun hrang hrang chhiat tawkte \anpuina atana Central YMA-in vehbur a khawn chu vawiin khan vanduaina tawk chhungkuate hnenah sem a ni. Aizawl khawpui chhung YMA Branch a\anga \anpuina dawngte chu vawiin chawhnu dar 2 khan Tuikhuahtlanga Central YMA Hall-ah sem an ni a. Sub-Headquarters-in a awp, Branch huam chhunga mi chu Sub-Headquarters Pisa-ah sem a ni thung a, Group YMA leh Central YMA-in a awp, Group YMA huam chhunga mi chu YMA Pisa leh hmun remchang laiah sem a ni. Central YMA Hall-a Aizawl khawpui chhung Branch-te tana \anpuina semna inkhawm chu Central YMA Vice President, Pu Vanlalruata’n a kaihruai a, Central YMA President, Pu Lalbiakzuala chuan, Mizo khawtlang nunah YMA hi awm ta lo se, Mizo hnam kal zel dan tur hi ngaihtuah tham tak nia a hriat thu a sawi a. Hman laia Zo nun zemawi chu mi tam takin thi tawh angin sawi \hin mah se, tun hnaia Mizoram hmun hrang hranga chhiatna thlengah hian Mizo zingah \anpui ngaite \anpui duhna rilru a la thi lo tih a lang chiang hle niin a sawi. Pu Lalbiakzuala chuan, tuna Mizoramin chhiatna a tawh hian khawvel hmun hrang hranga cheng Zofate inpumkhatna a ti\ha nia a hriat thu sawiin, hei hi Myanmar, Malaysia, Singapore, Australia leh hmun hrang hrang a\anga \anpuina lo lut hian a tifiah hle niin a sawi bawk.
Chhiat tawkte tana Central YMA-in vehbur a khawn tling khawm hi a vaiin cheng vbc. 1 leh nuai 47 chuang a ni a. |anpuina hi nunna chan mi 8 hnenah Rs. 1,30,000 \heuh, hliam mi 3 hnenah Rs. 50,000 \heuh, in chhe vek, a hmun ngaia sak lehna tlak loh chhungkaw 34 hnenah Rs. 80,000 \heuh, in chhe vek, a hmun ngaia sak lehna tlak chhungkaw 46 hnenah Rs. 60,000 \heuh, inm a \hen chhia, sak \hat leh tlak loh chhungkaw 14 hnenah Rs. 60,000 \heuh, a \hen chhia, sak leh tlak chhungkaw 115 hnenah Rs. 35,000 \heuh, mi in luah, bungraw chan chhungkaw 15 hnenah Rs. 40,000 \heuh leh chhan dang vanga harsatna tawk chhungkaw 41 hnenah Rs. 10,000 \heuh pek a ni a. Hei bakah hian Sihhmui, Cherhlun, Rabung, Hortoki, |awipui North-I leh Kawnpuia lawng bo, huan leh thlai chan chhungkaw 271 hnenah Rs. 20,88,000 pek a ni bawk. Vawiina \anpuina dawngtute hi an vaiin chhungkaw 547 an ni a, heng mite hnena sum sem chhuah zawng zawng hi Rs. 1,46,33,000 a ni a, sem bang Rs. 69,116 la awm chu a \ul anga pek chhuah leh a nih tur thu, Central YMA hruaitute chuan an sawi. Vawiina \anpuina pekte hi kumin June a\anga August thla chhunga chhiat tawkte an ni.
