Video Conferencing hi Commerce & Industries Minister Dr. R. Lalthangliana hovin sorkar mipawimawhten Aizawl atangin an lo zawm a, DoNER changtu Union minister of state Dr. Jitendra Singh leh Food Processing industries changtu union minister of state Pu Rameshwar Teli te pawh video coferencing ah hian an tel a ni.
Ei tur sawngbawlna hmunpui, Zoram Mega Food Park Pvt. Ltd hi NH-54 hrul, Khamrang ram acre 55 a zauah cheng vaibelchhe 75 leh nuai 20 senga din a ni a, cheng vaibelchhe 50 chu Ministry tum a ni a, a bak chu Board of Directors te tum a ni a, Board of Directors te hi mizo vek an ni.
Zoram Mega Food Park ah hian inhman tawm theih khawl leh bungraw changkang leh tunlai tak tak bun a ni a, eitur sawngbawl tur metric tonne 1000 vawn that theihna Cold Storage te; metric tonne 3000 dah theihna Drywarehouse te bakah eitur sawngbawlna hmanraw dangte bakah Food Testing Laboratory te a awm nghal a ni
A hawngtu, Pi Hamsimrat Kaur Badal chuan Prime Minister Modi a kaihhruai Sawrkar chuan hripui leng karah pawh kawng hrang hrangin ram intodelhna turin hma a la a, chung zingah chuan ei leh in sawngbawlna, food processing pawh lam pawh ngaihpawimawh a ni a ti a, Mega Food Park chuan Mizoram a kuthathawktuten an tharchhuah man man zawka an hralh theihna kawng a hawn bakah thalai food processing lama eizawng duhte tan remchanna tam tak a thlen a beisei tih a sawi.
DoNER changtu Union Minister of State Dr. Jitendra Singh chuan Mizoram chu state lian lo tak ni mahse, ziak leh chhiar tam lamah te, mipuiin Sawrkar an tawiawm that dan leh khawtlang leh Sawrkar tangkawpin hri leng an dona kawngah te state dang te tan entawntlak a ni a ti a. Minister of State Pu Rameshwar Teli pawhin thu sawiin, eitur sawngbawlna food processing lamah ramin hma a sawn theihna turin Mega Food Park chu Ministry in a duang a ni, a ti a. Thar chhuah tawih ral mai thei leh dah rei theih loh chi te chu food processing technology hmanga sawngbawl anih chuan loneitu thawh chhuah a ti pung dawn a, thalaite tan eizawnna kawng thar tam tak a hawng dawn bawk a ni a ti.
Commerce and Industries Minsiter Dr. R. Lalthangliana chuan Zoram Mega Food Park chu food processing lama Mizoram tan mellung pawimawh tak a ni a ti a, Mizoram Sawrkar flagship programme SEDP nen pawh a thil tum a in zulin loneitute leh kuthnathawktute pawhin an hlawkpui a beisei tih a sawi. Food Processing chu Mizoram Sawrkar in a ngaipawimawh hle tih sawiin Ministry of Food Processing kaltlanga hmalakna te chu theitawp chhuahin tih puitlin mek zel a ni a ti a, he hmuna inhman tawm theih khawl leh hmanraw dang bun te chu mahni-a eitur sawngbawlna lam buaipuitute tan a tangkai hle dawn a ni a ti a. Mizoram sorkar chuan Food Park hawn takah hian beiseina sang tak a nei a ni a ti.
Zoram Mega Food Park hawnna-ah hian P&E Minister Pu R. Lalzirliana, Lok Sabha MP Pu C. Lalrosanga, Tuirial bialtu MLA Pu Andrew H.Thangliana, Industrial Development Board Vice Chairman Pu C. Ramhluna, Commerce & Industries Department hotute leh Zoram Mega Food Park Board of Directors te an tel a ni.
