Cheng 200 note thar naktukah tihchhuah a ni dawn- RBI

Cheng 200 note thar chu naktukah tihchhuah a ni dawn tih Reserve Bank of India-in a puang a, hei hi sorkar laipuiin cheng 500 leh cheng 1000 note a tihtawp hnua RBI-in tangka note thar a tihchhuah palina tur a ni. Puan tawh angin, Finance Ministry chuan nimin khan sorkar laipuiin cheng 200 note thar hi a pawm tawh tih leh, nikum November ni 8-a tangka note lian pahnih tihtawp a nih avanga tangkafai indaih lohna thleng mek chu cheng 200 note thar hian a tihziaawm a beisei thu a sawi a, a hmelhmang leh lan dan tur pawh PM pisa hian a pawm tawh a ni. Cheng 200 note-ah hian ram chhunga tangka note dang ang bawkin hnampa, Mahatma Gandhi-a leh Ashoka pillar lem a chuang dawn a, Pu Gandhi-a lem hi a laiah dah a ni thung a, mitdelte tana hriat awlsam nan Pu Gandhi-a leh Ashoka pillar lem hi tlema tihpàwn deuh a ni a, hmasanga Buddhist hmun pawimawh, Sanchi Stupa lem pawh a chuang a, tangka note thar hi a mm 146 a sei, mm 66 a hlai a ni.