Reserve Bank of India-in cheng 200 leh 50 note thar a siam chuan Mizoram a lo la thleng lo. State Bank of India hotute hnen atanga Zonet thu dawn danin, cheng 200 leh 50 note thar tlangzarh a nih hnuah Mizoramin RBI atanga pawisa a la chah loh avangin note thar hi a lo la thleng ve rih lova, September thla tawp lamah pawisa hi chah tum a ni a, hetah hian Note thar hi eng emaw zat a lo thlen beisei niin an sawi. SBI hotute chuan, state-in pawisa a mamawh dan mil zela pawisa hi chah thin a nih thu leh, tunah chuan Mizorama pawisa awm zat chu la tam thawkhata ngaih a nih avangin chah rih loh a nih thu an sawi. Tun thla ni 25 khan RBI hian cheng 200 leh 50 note thar hi a tlangzarh a ni. SBI hotute chuan, nikum November ni 8-a sorkar laipuiin cheng 500 leh 1,000 note a tihhlum avanga harsatna chu a reh thawhkhat tawh niin an sawi a, pawisa tihhlum a nih hnua Mizorama pawisa lo thleng tawh chu mipui mamawh phuhru khawp a nih thu leh cheng 500 leh 2,000 note thar pawh mamawh khawp a awm tawh thu an sawi. Tun hnaiah Bank thenkhatin cheng 10 thir an dawng duh lo nia sawi a nih avangin sumdawngte zingah cheng 10 thir dawng duh lo an awm nia sawi chu pawi an tih thu leh, cheng 10 thir chu RBI-in dan ang thlapa a pawm a nih thu leh, a hman kawngah harsatna a awm lo tih SBI hotute chuan an sawi bawk.
