Chawngtea MSU Sub Hqrs. hruaitu \henkhat, Chakma-ten kut an thlak nia sawi a nih avangin vawiin khan Mizo Students Union leh Aizawl City College Joint Student Union-in Aizawl-ah kawng an zawh a, Vanapa Hall a\anga \anin, Hunthar venga Chakma House lam an pan a. Hunthar pengah Police-ten an lo dang a ni. Aizawl SP mawhphurhna la mektu, Pu C Lalthanmawia chuan zirlaite chu Chakma House thlen tum lo turin a ngen a, zirlaite an pun khawm chhan chu hriat thiampui mah se, dan leh thupek ken kawh a ngaih bawk si avangin innawr buai chu thil \ha ber a nih loh thu te, mawi lo taka an chet chuan ram chhung leh pawnah Mizo hmai a mâwk thei dawn tih te sawiin, Chakma House pawh thlen kher tum lo turin zirlaite chu a ngen a ni. Chanmari-a thusawitu, ACCJSU President, Lalnunpuia chuan, Chakma te avanga pun khawm a ngai fo mai chu zahthlak a tih thu sawiin, Chakma \henkhatin Mizo zirlaite an lo tibuai chu an duh loh thu te, an tam zawkna hmuna an ch>t dan chu an duh loh thu leh, en liam mai an tum loh thu a sawi. Hunthar penga thusawitu, MSU President RB Lalmalsawma chuan, Chakma te hian Mizoramah MLA leh Minister hial neiin, zalen takin an awm a, heti chunga ram leilung fa, Mizo te tibuaia a cho zawnga an awm leh zirlaite hial kut an thlak chu eng rilru nge an put tih chu a zawhna niin a sawi. RB Lalmalsawma chuan, Thawhlehni kal ta khan Chawngte-ah Chakma-ten zirlaite chu sport thei lovin an siam nia sawiin, zirlai hruaitute chu kut an thlak hial niin a sawi a, hemi avang hian niminah Chakma House chu zah takin an tlawh nia sawiin, heti chung hian a ni lo zawngin sorkar laipuiah thu thlenin, Central Force-te ven himna an dil niin a sawi. RB Lalmalsawma chuan, zirlaiten Mizoram Police-te chu an ring tawk tih a sawi a, engvanga Chakma-te hian Central Police force-te ven himna dil nge an nih tih leh, Mizoramah thil tum an nei em ni tih chu an zawhna a nih thu a sawi a, in\hen darh tur zawng emaw, tharum thawh zawng emaw-a thil an tih chuan kawng zawh ni lovin, a \ul dan anga an ch>t ve tur thu a sawi bawk.
MZP General Secretary, Lalramdinliana pawhin thusawiin MSU leh ACCJSU-te thil tih chu a tawp thlenga an thlawp tur thu a sawi a, Mizo-ten Chakma-te kut an tuar \hin chu a thlawn tawh dawn lo tih sawiin, kum 1966 March ni 1-a Mizoram zalenna sual ang kha zirlaite hian an ngam ve a ni tih leh, sorkar laipuiin Chakma-te a hum zel a nih chuan sorkar dang pawh belh mai an hreh loh tur thu, sorkar laipui hian hria se a duh thu a sawi. Zirlaiten kawng an zawh \an hma hian Aizawl Bawrhsap, Dr A Muthamma-i’n zirlai hruaitute chu a pisaah kawmin, an thil tih tum chu buaina thlen lo zawng leh muanawm taka ti turin a ngen a ni. MSU leh Aizawl City College Joint Student Union hruaitute hian Chakma House-ah mikhual an la awm em tih an enfiah a, an ngenna angin mikhual an awm tawh lo tih an finfiah hnuah Hunthar penga zirlai pung khawmte hmaah thil awm dan an sawi a, resolution an pass a, chumi hnuah Police-te nen innawr buai lovin an \in darh ta a ni. An resolution-ah chuan, Mizo kut thlaktu Chakma te chu Mizoram sorkarin na taka a hrem an phut thu te, heng kut tuarte hi zangnadawmna, cheng nuai 1 \heuh pe tura CADC an phut thu te, zangnadawmna an pek hma chuan Chakma House ah mikhual thlen an remtih loh thu leh dan lova Bangladesh a\anga Chakma lo lutte chu zawng chhuaka thawn let tura Mizoram sorkar an phut thute a ni.
Nizan khan MSU leh ACCJSU hruaitute chu Hunthar venga Chakma house-ah kalin, mikhual an awm leh awm loh an enfiah a, House LO, Pu PK Tong chu biain, zirlaiten House lam pana kawng an zawh dawn avangin mikhual tumah lo awmtir lo turin an hrilh a, an duh anga thil a thlen loh chuan engpawh thleng se an cho chhuaha an ngaih tur thu pawh an hrilh a ni.
Lungleiah pawh tukin dar 6 a\anga vawiin tlai dar 6 thleng khan Chakmate chu pawn chhuak lo turin Mizo Students Union-in an hriattir a, hemi avanga buaina thleng thei veng turin Lunglei District hotute pawh an inbuatsaih a, Magistrate-te an duty bakah Lunglei SP chuan Lunglei North Zone leh South Zone-ah Police te a duty-tir nghal a, hemi chhung hian buaina leh thil duhawm lo engmah a thleng lo a ni. Buaina chhuah \anna nia sawi, Chawngte C bakah, Chawngte P leh Chawngte L-ah te chuan vawiin khan nunphung engkim a pangngai a, Chawngte a\anga ZONET thu dawn danin, tun thla ni 27-a MSU hruaitute leh zirlai \henkhat inkara buaina chhuak bak chu buaina lam hawi thil thleng a awm zui lova, boruak engkim a pangngaiin a awm niin an sawi a ni.
