Sairang leh Mualkhang inkar, Changsil kai bula Tlawng luia Thawhlehnia truck tla luta chuang chin hriat loha bo ta mi pahnih zinga pakhat, Abdul Malik, kum 42 mi ruang chu nimin tlai khan Khamrang khaw zawnah hmuh a ni. A ruang hi Sairang Police Station-ah laka thil tihfel ngai te, Police-ten an tihfel hnuah nizan khan a chhungte hlan a ni a, an awmna khua, Karimganj District-a Dalopara panpui a ni. Tun thlenga chin hriat loha la awm, Islam Uddin-a ruang pawh zawn zui zel a ni a, vawiin tlai thleng khan zawn zel a ni a, a zawngtute hi Sairang Dinthar khaw mi bakah a chhehvel khuate leh lui dunga khuate an ni a, an zingah hian chin hriat loha bo ta te chhungte leh thian thate pawh an tel a ni. Puan tawh angin he truck hian mi pasarih phurin tun thla ni 29, Thawhlehni khan Aizawl atangin Silchar lam a pan a, Changsil kai bulah kawng thlangah tlan liamin Tlawng luiah a tla lut a, he truck-a chuang mi 5 te chu damin an chhuak a, mi dang pahnih hi an vanduai fal ta a ni.
