Champhai District-a Hmuncheng khaw mi, Lawmkima, kum 39 mi, February ni 23 atanga a awmna chin hriat lohva bo chu a ramvahpui, Lalbiaknia, kum 26 vel miin kaphlumin ramhnuaiah a lo phumbo a ni tih hmuh chhuah a ni. Hmuncheng khawtlang hruaitute hnen atanga thu dawn danin Lawmkima leh Lalbiaknia hi February ni 23 khan an khaw ram chhunga Chhiarpui rama Khamsen chung ramah sapelin an kal a, hemi zan hian Lawmkima hi a haw ve tak loh avangin zawn zui a ni a, a bo chungchang hi Khawzawl Police Station-ah hriattir a ni a, Police te chuan a ramvahpui, Lalbiaknia chu thu zawhfiah turin February ni 27, Thawhlehni khan an la a, chik taka thil an zawhfiah hnuah Lalbiaknia hian February ni 28 zan khan a kahhlum thu leh ramhnuaiah a phum thu Police te a hrilh a, Lawmkima ruang la tur hian a zan a zanin Hmuncheng khaw mite chu an thawk chhuak a, nimin zing khawvar hma khan la-in, khawvar rual vel khan an khuaa an thlenpui a, Khawzawl damdawi ina doctor enfiah tir a nih hnuah nimin khan vui a ni. Police te chuan Lalbiaknia hi tualthah thubuai an siam sak a, tunah hian Magistrate thu angin Champhai District Jail-ah dahluh tawh nia thudawn a ni.
