Chakma Autonomus District Council sum chingpen awm nia sawi chungchang chu Accountant General in a chhui mek tih MNF Legal Board Chairman Pu J Lalremtuata Hmar in a sawi. Vawiina an Party Office-a chanchinbumite a kawmnaah Pu J Lalremruata chuan, CADC a Congress sorkarin sum tam tak a ti chingpen nia an hriat avangin an party Sr Vice President Pu Tawnluia’n chhuichiang tura ngenna, tun thla ni 11 khan Larsap hnenah a thlen tih a sawi a, Larsapin Accountant General chu chhuichiang turin a ti ta niin a sawi. Pu J Lalremruata Hmar chuan, vawiin khan AG chu an hmalak dan an zawhfiah thu a sawi a, AG hotute hian CADC sum chingpen awm nia sawi chu a bik taka chhui a nih thu leh thil hmuhchhuah an neih thuai an beisei thu an lo hrilh tih a sawi. Pu J Lalremruata Hmar chuan, CADC a Congress sorkar CEM leh EM ten sum tam tak an fanghmano ei niin a sawi a, cheng nuai 600 zet chu a hmanna hriat lohin a bo niin a sawi.
Pu J Lalremruata Hmar chuan, Congress Media Dept ten CADC inthlan tura Futuli a Congress Candidate chuh tu dang awm lova tlinga puanna, High Court in a tih khawtlai tak chu hnuhlet a nih veleh Congress candidate chu MDC ni nghal mai tur anga an sawi chu thu dik lo niin a sawi a, Court in thutlinga pawma a tih khawtlai tawh, court thutlukna kimchang puan anih hmaa court thutluk dan tur rinthua lo sawi lawk chu thil fel lo tak niin a sawi. —————
Mara Autonomous District Council hnuaia Thawhlehnia Village Council 91 inthlanna result chu vawiin khan Mizoram State Election Commission-in a tichhuak a, rorellai pawl Congress chuan seat 246 la-in, VC 54-ah rorelna an chang a, opposition party lian ber MNF chuan seat 123 la-in, khaw 17-ah VC an siam thei a, BJP chuan seat 43 la-in khaw 5-ah VC an siam thei a, Independent-in seat 4 la-in khaw 1-ah VC an siam thei a, chak bik awm lohna VC 14 a awm bawk. VC member thlan thar te hi tun thla ni 21, Inrinni ral hmaa VC rorel pawl din fel vek tura hriattir an ni.
