He motion sawihona leh vote lakna vawiina Chakma Autonomous District Council Session Hall Kamalanagar-a neih hi Lawngtlai Bawrhsap, Pu N. Chakhai-an a kaihruai a, hetah hian Pu Shanti Jiban Chakma thlawp zawngin MDC pakhatin vote a pek laiin MNF Legislature Party hruaitu, Pu Roshik Mohan Chakma thlawp zawngin MDC 11-in vote an pe a ni. Chakma Autonomous District Council-ah hian tun dinhmunah MDC 19 an awm a, vote laknaah hian 12 an tel a, a bak 7 te chu an tel lo a ni. Hemi hmalam hian Chakma Autonomous District Council-ah hian MNF MDC 7 leh Congress MDC 4, MNF zawm thar te chuan an Legislature party hruaitu atan Pu Roshik Mohan Chakma an thlang a, hemi hnua tun hnaia Session neihah CEM Pu Shanti Jiban Chakma dinhmun fiah a lo ni tawh a, thlawptu a ngah tawk loh vangin sorkar a siam thei tawh lo tih sawia Mizoram Larsap hnenah lehkha an thehluh avangin Larsap chuan Council House chhung ngeia CEM dinhmun fiah turin thupek nimin khan a chhuah a, he thupek ang hian vawiin khan vote la-in CEM Pu Shanti Jiban Chakma chu paih a ni ta a ni.
