Member 20 awmna, Chakma Autonomous District Council (CADC) inthlanah vawiin khan mipuiten tluang takin vote an thlak. Court-a thu inchuh a awm avanga inthlanna neih remchang rih lo, Fultuli bial tih loh bial dang 19-ah tukin dar 7 a\anga tlai dar 5 thleng khan vote thlak a ni a, buaina leh harsatna thleng lova zawhfel a ni. ZONET zawhna chhangin Election Officer, Pu Lalrinawma chuan vote thlak chhung hian khawi hmunah mah buaina leh harsatna report dawn a awm lo niin a sawi a, amaherawhchu, khaw \henkhat biak pawh theih a nih loh avangin an dinhmun kimchang erawh chu a hriat thuai theih loh niin a sawi a ni. Vote tla hi vawiin chawhnu dar 1 khan za zela 50 chuang a tling tawh a, hemi hnu hian ngawrh taka vote thlak chhunzawm a nih avangin vote tla zat hi a pumpuia hriat theih a nih hun chuan za zela 75 leh 80 inkar vel a tlin phak beisei a ni. Vote thlakna atana hman EVM te hi Polling Party te chuan vawiin tlaia vote thlak zawh khan kharin vote chhiarna tur hmun Chawngteah an rawn la khawm mek a, lam hlaa duty te pawhin zanin hian Chawngte an rawn pan nghal dawn a, kawngah harsatna a awm loh chuan EVM zawng zawng hi naktuk chawhma dar 9-ah chuan hmuh kim vek theih beisei a ni a, chhun dar 11-ah chuan tihfel tur te tihfela Strong Room-ah party hrang hrang hruaitute hriatpuia dah luh hman a nih beisei a ni. Puan tawh angin he inthlannaah hian Congress chuan Candidate 19, MNF Candidate 18, BJP Candidate 19 leh Independent 7 an nei a, vote tla te hi karleh thawhlehni, tun thla ni 24-ah chhiara, hemi ni hian result pumpui hriat theih beisei a ni.
