Chakma Autonomous District Council (CADC)-a congress sorkar dinglai chu dan kalha thil ti-a puh a ni a, Lawngtlai DC in a chhui chian hnuah heng puhnate hi nemnghetin Governor chuan CADC hi Governor’s Rule ah a dah.
Sorkar thuchhuah tarlan danin CADC hian dan bawhchhia in thil a ti tih report a awm avangin a chhui chiangtu tur Commission din a ni a, Lawngtlai DC Dr Arun T chu CADC thil tih dante chhui tura ruat a ni. Commission hian a thil hmuh chhuahte chu Governor hnenah thehlutin hetah hian CADC sorkar hian dan dinglai Chakma Autonomous District Council (Constitution, Conduct of Business) Rules 2002 kalhin thil tam tak a ti tih hmuhchhuah a ni a, CADC sorkar hian ram danpui 6th Schedule in a tarlan angin hna a thawk thei lo tih a chian tak avangin Governor chuan danin thuneihna a pek angin CADC sorkar thuneihna zawng zawng chu a laksak a, CADC inrelbawlna hna pawimawhte chu thla 4 chhung atan emaw inthlan \hatna neih zawh fel hma emaw Lawngtlai DC kuta awm tirh turin a ti a ni.
CADC ah hian thlan tlin member 20 an awm a, Congress party chuan member 17 neiin congress in ro a rel a, Chief Executive Member hmasa Pu Kali Kumar Tongchangya chu paihthlak anih hnuah nikum November ni 3 khan Chief Executive Member thar Pu Amit Kumar Chakma lakluh a ni a, Pu Amit Kumar Chakma hian thla 4 chuang hlek sorkar a kaihruai hman tihah tunah hian \hiah a ni ta a, CADC term dinglai hi thla thar April thlaa tawp tawh tur a ni.
MNF party chuan CADC sorkar hian dik lo takin thil tam tak a ti nia sawiin Governor hnenah chhui chiang tura ngenna an lo thlen tawh a, a hun taka CADC inthlanna buatsaih tura ngenna pawh tun thla ni 14 khan Governor hnenah hian an thlen bawk. Chakma Autonomous District Council ah hian vote nei hmeichhia 15,087 leh Mipa 15,478 an vaiin mi 30,565 an awm.
