He eirukna thubuai chhuitu Anti Corruption Bureau chuan an thil chhui dan kimchang tarlanna lehkhapawimawhte nen kumin January ni 28 khan MLA nilai Dr BD Chakma thubuai siam sak phalna, prosecution order hi a dil a, hei hi Governor chuan a enfiah hnuah Dr BD Chakma hi court-a a chungthu ngaihtuah tur a ni tih pawmin, Zirtawpni kalta khan thubuai siamsak phalna, prosecution saction hi a pe a ni. Dr BD Chakma rual hian he eirukna thubuaia midang 12 te thubuai siamsak phalna pawh sorkarin a pe nghal a, heng mi te hi MDC nilai 3 leh a hlui 9 an ni.
District Council & Minority Affairs Department hotute hnen a\anga ZONET thudawn danin Dr BD Chakma hi CADC a Chief Executive Member a nih laia CADC a hmasawnna hnathawhna tur Sorkar sum Rs 8,87,270 chu personal loan/pay Advance a hmangah puh a ni a, ama rual hian tuna MDC nilai Mohan Chakma, Amit Kumar Chakma leh Ajoy Kumar Chakma bakah MDC hlui Buddha Lila Chakma, Buban Kumar Chakma, Amar Smriti Chakma, Adikanta Tongcangya, Chitra Kumar Chakma, Parimal Chakma, Susen Chakma, Sushil Chakma leh Taranisen Chakma te pawh he thubuai tho hi awrhtir an ni.
District Council & Minority Affairs Department hotute chuan, CADC a sum hman dan dik lo awm chungchang chu kum 2017 khan an hria tih an sawi a, khatihlaia Larsap Lt. General Nirbhay Sharma khan hetihlaia Lawngtlai DC Dr A Mutthamma chu chhui tura a tih hnuah CADC a hmasawnna hnathawhna tur Sorkar sum cheng Vaibelchhe 1 leh nuai 14 vel chu MDC ten an mahni Personal loan/pay advance atan an hmang tih a hmuh chhuah thu an sawi a, hemi hnu hian MDC te chu an pawisa hman te rul leh tura tih an ni tih an sawi a, a hnuah pawh pawisa rul tura hriattir nawn leh an nih thu an sawi a, khatihlaia Larsap Lt. General Nirbhay Sharma khan ACB chu sum chingpen chhui tura a a tih angin kum 2018 April ni 8 khan ACB ah FIR thehluh a ni a, ACB in an chhui hnuah MDC ten sum an hman rul vek tawh anga report chu an la rul lo tih an hmuchhuak a, ACB chuan court-a an chungthu ngaihtuah phalna, Prosecution sanction chu dilin hei hi Larsap chuan a phalsak ta a ni.
