Kum 2019-21 chhunga Central YMA hruaitu thar tur hi YMA General Conference neih mekna, North Vanlaiphai-a Chhurbura Run-ah vawiin khan thlan a ni a, post by post-a inthlanna hi buatsaihin, President-ah Pu Vanlalruata, Tuikual South; Vice President-ah General Secretary nilai Tv. Lalhmachhuana, Chaltlang Lily veng; General Secretary-ah Prof. Lalnuntluanga, Khatla West; Assistant Secretary-ah Dr. Malsawmliana, Vaivakawn; Treasurer-ah Finance Secretary nilai Pu Fabian Lalfakawma, Chawlhmun leh Finance Secretary-ah Pu Roneihthanga, Nursery veng-te thlan an ni.
Central YMA hruaitu thlan thar zingah hian OB nilai 3 awmin, a dang pathum chu mi thar an ni a, Central YMA hruaitu nilai an Post ngai la chelh thei zingah Vice President nilai Pu R. Lalngheta, Asst. Sercretary, Pu Peter Chhakchhuak leh Treasurer, Pu Lalrochuanga Pachuau-te thlan chhuah zingah an tel lo a ni.
Hruaitu thar thlan hlan hian North Vanlaiphai Community Hall-ah vantlang inkhawm neih a ni a, inkhawm hi CEC member, Pu R. Lalpeka’n a kaihruai a, CEC member, Pu Lalhmangaiha’n ‘Sik leh sa inthlak danglam chungchang’ tih thupui hmangin thu a sawi a, zai, hnam lam leh lemchan entir a ni. YMA General Conference vawi 72-na neih mek hi zaninah a \iak dawn a, palai thlahna inkhawm chu zan dar 7-ah Chhurbura Run-ah neih tur niin, inkhawm hi Central YMA Vice President nilai, Pu R. Lalngheta’n a kaihruai ang a, hetah hian Central YMA hruaitu thar thlanna buaipuituten hruaitu thlah tharte inhmelhriatirna an nei ang, Preident thlan tharin thuchah a sawi bakah CEC member, Pu V.L. Chhuanga Chhangte-in palai thlahna thu a sawi ang. Kumpuan bawhzui \hate hnenah lawmman hlan a ni bawk ang.
Tun dinhmunah Central YMA hnuaiah Branch 803, Group 47 leh Sub-Headquarters 5 a awm a; YMA member 4,46,623 awmin, mipa 2,63,649 leh hmeichhia 182,974 an ni. Mizoram páwnah – Assam, Meghalaya, Manipur, Tripura leh Nagaland-ah YMA Group leh Granch a awm a, ram páwn Bangladesh-ah Sajek Branch a awm bawk.
