Central YMA President leh Central KTP hruaitu lo ni tawh, Pu Lalchungnunga chu nizan dar 9:30 khan a boral a, kum 66 a ni. Pu Lalchungnunga hi kal na avang thi a ni a, vawiin khan a chenna, Ramhlun North-ah vui a ni. Pu Lalchungnunga hi kum 1951 December ni 22 khan a piang a. Kum 1976 khan Mizoram sorkar-ah LDA hna a zawm a, Transport Department Joint Director a nih laiin kum 2014 August thla khan pension-in a chhuak a ni. Pu Lalchungnunga hi Central KTP Asst. Leader leh Finance Secretary a ni tawh a, kum 2001 atanga 2003 thleng khan Central YMA Vice President a ni a, kum 2004 atanga 2007 thleng khan CEC member a ni a, kum 2007-09 chhung khan Vice President a ni leh a, kum 2009 atanga 2011 chhung khan Central YMA President a ni. Pu Lalchungnunga hi kum 2001 atang khan a insawisel a, zunthlum, nerve tha lo leh kal tha lo avangin enkawl reng a ni a, Pathianni kal ta zan khan a thaw a hah avangin Newlife Hospital panpui a ni a. Zan dar 10 velah ICU-ah dah a ni a, nizan khan a boral ta a ni. A ruang hi lumen a nih hnuah vawiin khan Bialtu Pastor, Rev. Zothansanga’n a vui a ni.
