Central YMA President hlui Pu Vanlalzawma, Aizawl West III bialtu MLA chuan ram leh hnam himna ngai pawimawh reng turin YMA member te a chah. A bial chhung YMA Branch 4 te hnena, an huam chhung theuha damlo a mamawh apiangte hman tur, Portable Oxygen Concentrator a hlan pahin he thu hi a sawi a. Khatla South YMA Hall-a neih khawl inhlanna ah hian Pu Vanlalzawma chuan YMA chu midang te tanpuitu a ni tih sawiin, kawng engkimah mi thliar hranna nei lova hma la zel turin a chah a. Mi thenkhat, YMA chu thil dil pawl tia sawi an awm thin thu sawiin, YMA hruaitute chu an rilru ti na lo tura a duh thu a sawi a, an thil dil chu an mimal tana dil an nih loh avangin inthlahrunna tur a awm lo a ni a ti. Pu Vanlalzawma chuan, YMA member te chu tu pawh tanpui an ngaih chang a, hnuchhawn lo turin a chah a, YMA bungrua te pawh tu tan pawha hman theiha siam chu YMA tih tur nia a ngaih thu a sawi bawk. Pu Vanlalzawma hian a bial chhunga YMA Branch 4 hnenah Portable Oxygen Concentrator hi a lo hlan tawh a, tunah hian Khatla South, Bungkawn Vengthar, Nursery leh Lawipui Branch YMA hnenah a hlan leh a ni. Inkhawm hi Khatla South Branch YMA Treasurer Pu Tlangthangluaia’n a kaihruai a, Pu Vanlalzawma hi Aizawl West III Block MNF hruaituten an tawiawm a ni.
