Inthlanna dik leh felfai neih theihna tura ZPM hruaitute an kawmnaah hian Central YMA President, Pu Vanlalruata chuan, YMA chu Politics nen inkungkaihna a nei lo tih sawiin, \an bik emaw duhsak bik emaw pawh an nei lo niin a sawi a, Mizoram inthlannaa helpawl thawhpui tih chu kum 2003 vel a\anga hriat \an a ni tih sawiin, hei hi YMA chuan \ha lo a tih takzet thu leh pawl hrang hrangte chu tute emaw chakna hmanga tlin tum lo turin an beisei tih a sawi. Pu Vanlalruata chuan, tute emaw tihbik nei zawnga chibing politcs pawh khel lo turin Political Party-te chu beisei an ni tih a sawi a, Mizoram chu mihring tlemte awmna a nih avangin hmasawnna hna an thawk duh a nih chuan tute emaw hnam bil tana thawk mai lova, Zoram mipui zawng zawngin an hlawkpui theih tura hmalak tur a ni tih chu YMA ngaihdan a nih thu a sawi. Central YMA President chuan, kawhmawh bawl vanga Tripura-a awm mek Tuikuk-te vote beisei vangin an awmna hmuna kalchilha vote dil lo turin Political Party hrang hrangte chu an ngen tih a sawi a, Mizoram chu hmarchhak biala inthlanna thianghlim leh felfai bera kalpui \hinna hmun a nihna chu vawn nun zel an duh a, Election Commission of India-in Candidate pakhat tana cheng nuai 20 thleng hman a phalsak chungchangah pawh Mizoram chu mipui tlemte, State danga Assembly bial pakhata mihring cheng zat vel chauh an nih avangin Candidate-te pawhin he thupek hi zawm ngei se an duh tih a sawi a ni.
Central YMA General Secretary, Pu Lalhmachhuana pawhin, Joint NGO Coordination Committee ngen anga ZPM-in Chakma candidate dah loh an tum thu an puang chu an lawm hle tih sawiin tunah hian ruihhlo chu hnam hmelma tling khawpa buaipui mek a ni tih a sawi a, sorkarna an lo chang a nih chuan ruihhlo vanga harsatna thleng \hin titawp tura theihtawp chhuah turin a ngen a ni.
An inkawmna kaihruaitu ZPM Steering Committee Chairman, Pu Lalliansawta chuan, inthlanna thianghlim leh felfai a awm theih nana Central YMA hmalakna chu chhuanawm a tih thu a sawi a, YMA duhdan leh ZPM duhdan chu kawng tam taka a inan thu leh YMA chu tun aia khauh zawkin kal se tih chu an duhdan a ni tih sawiin ECI-in inthlanna cheng nuai 20 thleng hman a phal chungchangah an pawl chuan harsatna an nei lova, Candidate tam zawk chuan nuai 20 hman tur hi an nei lo hrim hrim niin a sawi bawk.
Central YMA hruaitute zawhna leh an hriat duh hrang hrang sawifiahtu ZPM Leader, Pu K. Sapdanga chuan, ZPM-in sorkar khalh ngil tura a ruat Val Upa Council chu an sawm chawp a nih thu leh hruaitute kalsual tur veng tur liau liau a din a ni tih a sawi a. Val Upa Council chu sorkar Policy duang tur emaw, sorkar hmalakna kengkawhtu tur an ni lo niin a sawi. Pu K. Sapdanga chuan, ZPM sorkar chuan zu a zuar lo ang tih chiang takin Resolution an lo siam tawh tih sawiin, ruihhlo leh a kaihhnawih dangte pawh veng tura \an lak tum a, pawl dang nena thawhho chungchangah ZPM Steering Committee chuan inthlan hma emaw, inthlan hnu emaw pawh BJP chu thawhpui loh ni se tih an rel tawh niin a sawi bawk.
ZPM-in kalphung thar sorkar a kalpui dan tur sawifiahtu ZPM Steering Commitee Vice Chairman, Dr. Kenneth Chawngliana chuan, ZPM sorkar hnuaiah chuan Chief Minister leh Party President chu mi pakhat tan chelh kawp a rem dawn lo nia sawiin hei hi mi pakhatin thuneihna sang lutuk a nei tur venna a ni a, bial hrang hranga ZPM candidate-te chu vote thianghlim lo zawng lo turin an inhrilh thu leh Tripura-a Tuikukte pawh an awmnaa kal chilh lo turin an hriattir tawh niin a sawi a ni.
