Gas ti chingpentu an man te hi vai panga an ni a, heng mite hian truck pathum-a phurh eirawngbawlna gas te ti chingpen-a, an gas phurh, bur ruak danga an thun chhawng lai Kawnpui ram chhungah an man a. Gas te hi Seling Gas Agency, Tlabung Zomawi Gas Agency leh Biakkungi Gas Agency-a dah tur a ni. Truck pathum leh Gas cylinder 70 bakah a thun chhawnna atana an hman, hmanraw \henkhat chu YMA Vigilance Committee te leh Police te hian an man sak a, Kawnpui police Station ah thubuai ziah luh a ni.
Nizan dar 7 vel khan Vairengte IOC vengah Petrol pawlh dal tumlai pawh YMA Vigilance committee leh Police te \angkawp hian an man bawk a, Tank lorry hi Dholai Cachar lam mi vai pakhat khalh a ni a, Vairengte IOC venga cheng Emmanuel Lalawmpuii kum 40 miin a lo lei sak a ni. Tank Lorry bakah hian Diesel litre 1210, khawnvartui litre 700 leh barrel ruak 19 man a ni a. Vigilance Committee hruaitute sawi danin oil pawlhdalna hmun hi remchang taka duan sa a ni a, truck hi kawngpui sira din tirin, awlsam taka inhnuai lama pipe hmanga oil hip thlak theih tura duanfel thlap a ni. Hemi chungchangah hian Vairengte police te chuan thubuai an ziaklut a ni.
Central YMA Vilance Committee Secretary Pu HF Lalrinpuia chuan Mizo mipuite chu hnamdang dan lova sumdawngte thawhpui lo turin a ngen a. Hnamdangten anmahni thuin ngampa takin thil dik lo an ti ngawt ngam lo a, mizote zingah lo thawhpuitu an awm \hin avangin an ngampat phah a ni a ti a, Sumdawnna chu hnam inchim ralna kawng awlsam a nih avangin mipuite \hangharh turin an ngen tih a sawi. Central YMA Vigilance committee hian Aizawl leh a chhehvel-a hnamdang dan lova sumdawng te enfiah hna an kalpui chho mek bawk a ni.
