Sorkar hna lakna leh promotion-a hnam hnufual zawkte tana hmun hauhsakna, reservation chu tih tawp tumin sorkar laipuiin hma a la tih Congress party hian an sawi a. Aizawl Vanapa Hall kawta lungawi lohna an lantirnaah hian MPCC President, Chief Minister hlui Pu Lal Thanhawla hian ram danpuiin hnam hnufualte a duhsakna BJP sorkarin nuaibo tuma hma a la chu a theih chhung chu an dodal dawn tih a sawi.
Pu Hawla hian, Hindu lal ram siam tumtu BJP sorkarin CAA a hman hnuah hnam hnufual zawkte tana ram danpuiin duhsakna a pek tihbo an tum leh zel chu hnam tlem zawkte tan a pawi hle dawn tih a sawi a, hei ni Mizo te tan hmelma lian tak a nih thu sawiin an dodalna chu party thil a ni lova hnam leh sakhaw tan a ni a ti a, lungruala do tlan a \ul tih a sawi.
Pu Hawla hian, Centrala roreltu BJP sorkar chu Hindu lal ram din duhtu RSS te thununna hnuaia awm a ni a ti a, Kristian leh mosolman te chu ramdang sakhuaah an ngai tlat a, India ah hmun an nei tur a ni lo tih chu an ngaihdan a nih tlat avangin Kristian sakhua tih bo chu an tum zinga mi a ni a ti a, Hindu sakhua vuantu zingah NDA sorkarin CAA a pass duh lo tam tak an awm laia Mizoramin Lok Sabha MP a neih chhunin a tlawp zawnga vote a pe chu ringtute tan a tlawm tlak a, a ringtupuite phatsanna lian tak a ni a ti a, hetihrual hian thlawp tura hrilhtu te pawh Hindu leh hnam dang laka inhralhah a puh bawk.
Pu Hawla hian, sorkar laipuiin CAA a hman hnuah Uniform Civil Code hman tumin hma an lak chhunzawm mek tih a sawi a, he thil hi Union Home Minister pawhin an hman tur thu a lo puang tawh tih sawiin an hmang ang tih a hlauhawm hle a ni a ti a, uniform civil code chu khawtlang nun leh inrelbawlna te Hindu dan hnuaia kalpui tumna a nih avangin mizo hnam leh sakhaw tan a pawi hle dawn a ni a ti.
Pu Hawla hian kawng hrang hranga BJP sorkarin hnam leh sakhaw tana pawi tur zawnga a hmalakna dolet chu party thil ni lovin, hnam thil a ni a ti a, ringtute hmanraw \ha ber \awng\ainaa \an lak a ngai a ni a ti.
Central Sorkarin Schedule Caste, Schedule Tribe leh OBC tana sorkar hnaa Reservation a siam \hinna tihtawp tum nia sawi a duh lohna Congress in an lantirnaah hian duhlohna thuziak chi hrang hrang an keng a, an party General Secretary Pu TT Zothansanga leh Pu Pu Joseph Lalhimpuia secretary te pawhin thu an sawi a, Resolution an pass ah BJP kaihhruai sorkarin hnam hnufual te tana Reservation awm sa nuaibo tuma hma an la chu an duh loh thu leh an dodal zel tur thu te, zirna lama hmasawm theihna tura NGO te hmalakna leh Kohhranin fa nei tam tura hma a lakna chu an thlawp thu te, a kalh zawnga BJP sorkarin hma a lakna reng reng an dodal tur thu leh BJP-in Hindu lal ram din tuma hma a lakna hrang hrangin Mizote rilru a tih nat thu te, India ram chu sakhaw zalenna ram a ni zel tura an duh thu te an tarlang a ni. MPCC hian an resolution pass hi Governor office ah an thehlut nghal a ni.
