Central KTP Committee Meeting vawi 708-na chu nimin khan Synod Committee Room-ah Central KTP Leader, Rev. Zothansanga kaihhruaia neih a ni a, hetah hian thla leh, March ni 1 atanga ni 4 thlenga West Phailenga KTP General Conference neih tur programme thlirho a ni a, hemi bakah hian kum 2018-2019 chhung atana bial budget ruahman pawh thlir nawn a ni a, he Conference-a ngaihtuah tura bial 69 atanga thu thehluh 110 zingah chuan Youth Recreation Centre chungchangah rawtna 11 a tel a ni. Hemi bakah hian ruihhlo leh a kaihhnawih chungchang te, kum puan atana rawtna 19, thupui zir tur atana rawtna 11 leh rawtna dang engemawzat a awm a, heng rawtna te hi Conference-a chhawpchhuah tura thliar fel a ni. He meeting hian kum 2018 atanga kum 2020 thlenga Central KTP Hruaitu thlanna neih tura khawpui bial 46 atanga rawtna siamte a thliar fel bawk.
West Phailenga KTP General Conference vawi 57-na neih turah hian Thupui atan “Krista chhinchhiahna put” tih thlan a ni a, he thupui tlawh chhan hian Rev. Vanlalzuata’n Pathian thuchah a sawi thin ang.
