Central YMA hnuaia Central Coordination Committee, vawiina Central YMA Office-a \hu khawm chuan October ni 17 a\anga ni 19 thlenga Champhaia YMA General Conference neih tura thu ngaihtuah tur lutte thlir hovin an ching fel. Central YMA hruaitute hnen a\anga thu dawn danin, kumpuan atana rawtna lut 3 – Ram leh hnam humhalh tih te, Zirna uar tih te leh Ruihhlo do tih te chu Conference neih huna buk atan chhawp chhuah tum a ni. YMA khawih Agenda atana rawtna lut 25 zinga 5 chu ngaihtuah tura pawm a ni a, chungte chu Mizo lengkhawm, khawhar hla thluk, \hangtharten an hriat zui zel theih nan solfaa dah ni se tih te, hlo túr leh rannung thahna hlo, fimkhur taka hman a nih theih nan a \ul dan angin YMA-in hma la rawh se tih te, ruihhlo ngaite chhanchhuahna tur, Rehabilitation Centre \ha leh changtlung tak neih theih nan Central YMA-in hma la rawh se tih te, Mizorama Central leh State Institution hrang hrangah Mizoten seat tam zawk an chan theih nan Central YMA-in hma la rawh se tih te leh Mizoram hmun hrang hranga inkalpawhna kawngte, tun aia \haa siam a nih theih nan Central YMA-in hma la rawh se tih te a ni. Sorkar khawih Agenda sawiho tura pawm zingah chuan thlaia intodelh zawk theih nan thingtlang a\anga thlai thar te khawpui chhunga zawrhna tur sorkarin ngaihtuah rawh se tih te, Mizoram leh Bangladesh inri-na ramri hi tun aia \haa ven a nih theih nan ramri-a BSF te hi Assam Rifles-a thlak a nih theih nan hma lak ni rawh se te leh dan lo anga din Chakma Autonomous District Council hi dan anga \hiah a nih theih nan Central YMA-in hma la rawh se tih te a ni. Central Coordination Committee \hu khawm hi Central YMA President, Pu Lalbiakzuala’n a kaihruai a, hmun hrang hrang a\anga lo kal rorel palai 210 an tel a ni.
