Rangkachak chhertu lar, Nirav Modi-a lakah vawiin khan CBI-te chuan thubuai thar an thehlut leh. Hei hi Nirav Modi-a laka thubuai pahnih siamna a ni a, he thubuai-ah hian Punjab National Bank atanga sum lakchhuahna tur dik lo taka lakchhuah chungchangah, Firestar hnuaia company hrang hrangte nen an inthurual niin tarlan a ni a, PNB-in cheng vbc 321 a hlohna turin, Nirav Modi leh Firestar-te hian dan an bawhchhe lui nia tarlan a ni bawk. Puan tawh angin Nirav Modi hian PNB nena inremna, dik lo taka ziah hmangin, cheng vbc 6200 la chhuakah puh a nih vangin, thubuai siam sak a lo ni tawh a ni.
He thubuaia inhnamhnawiha puh, Nirav Modi-a pate-a, Mehul Choksi chuan nimin khan CBI hnenah, a passport hren sak a nih avangin, India rama kir leh chu duh mahse, a theih loh thu a sawi a, a passport hren a nih chhan leh India ram tana hlauhawm a nihna Mumbai-a Regional Passport Office-in an hriattir loh thu-te a sawi bawk a, a in leh bank account hren a ni te leh a pisa-te kharsak a ni chu amah hawtute thiltih niin a sawi bawk a, CBI-te chu amah tihchhiat tum hrim hrim-ah a puh let bawk. Puan tawh angin Choksi leh Nirav Modi-te hi kumin January khan ram an lo chhuahsan tawh a ni.
