Hindu pawl pakhat, Dera Sacha Sauda hotu, Gurmeet Ram Rahim Singh-a chu pawngsual thubuaiah thiam loh chantir a nih hnuah hren nghal a ni a, hrem a nih dan tur kimchang hi kar leh Thawhtanni khian puan a ni ang. He thubuai ngaihtuah chungchang hi vawiina ram puma chanchin langsar ber a ni a, a chungchang, Haryana-a Panchkula-a Special CBI court-in a ngaihtuahna-ah hian amah zuituten car 200 velin an zui a, sorkar pawhin tukin atang khan Haryana Police 50,000 vel leh CRPF company 53 a dah hial a ni. Pawngsual thubuaia thiam loh chantirte hi kum 7 atanga kum 10 thleng, lung ina khung theih an ni a, he thubuai hi kum 15 chhung a inchiah tawh a, kum 50 mi, Gurmeet Ram Rahim Singh-a chungchanga thutawp siam a nih hma darkar hnih velah khan Punjab and Haryana high court chuan, Rahim Singh-a zuituten buaina an siam emaw, boruak tha lo a thleng emaw a nih chuan tharuma nawr mai turin Haryana sorkar chu a hrilh a, Gurmeet Ram Rahim-a zuitute zinga tupawh, a tul phawt chuan buaina tisosang leh khawsak phung pangngai tibuaia puhna thubuai siamsak nghal turin a ti bawk a ni. Haryana CM, Manohar Lal Khattar chuan he thubuai ngaihtuahna leh a hnu lama buaina chhuak thei hmachhawn thei turin sorkar chu a inpeih tih a sawi a, court thuchhuak chu engpawh ni se, bawhzui a ni ngei dawn tih sawiin, buaina a chhuah pawhin sorkarin a tul angin a ching fel ang, a ti bawk.
Kum 2002-ah daih tawh khan Gurmeet Ram Rahim-a pawla tel, Dera sadhvi an tih, hmeichhe pakhatin a hming ziak lovin, chutih laia PM, Atal Bihari Vajpayee-a hnenah, Ram Rahim-a hian amah a pawngsual tih hrilhin lehkha a lo thawn tawh a, amah bakah Haryana-a Sirsa khaw daifema an hmunpui, Dera campus zau tak chhungah Ram Rahim-a hian amah zuitu, hmeichhe dang tam tak pawh a pawngsual niin a sawi a, he lehkha hi Punjab and Haryana high court-in bawhzuiin, Ram Rahim-a hi mipat hmeichhiatna lam thubuai siamsak turin CBI chu a hrilh a, CBI hian a bawhzui ta zel a ni. CBI chuan he pawla hmeichhia, sadhvi 18 chu thu a zawtfiahnaah an zinga pahnih chuan, an hotupa hian a pawngsual niin an sawi.
Vawiina a chungchanga thutawp siamna court pan tur hian Gurmeet Ram Rahim-a hian tukin dar 9 khan Chandigarh atanga km. 260-a hla, Sirsa-a an pawl hmunpui chu a chhuahsan a, motor 200 velin an zui a, DGP, BS Sandhu erawh chuan, motor heti zozai inzuitir hi phal a nih loh thu sawiin, a then chu hawtir an nih tur thu a sawi. Dera Sacha Sauda hotu, Gurmeet Ram Rahim Singh-a hian puh a nihna chu thu dik lo nia sawiin, a taksa pawhin hetianga dik lo taka hmeichhe laka khawsak hi a tlin lo niin a sawi reng a, pawngsual thubuai bakah hian tualthah thubuai pawh pahnih a nei a ni. Ram Rahim-a te pawl hmunpuiah hian mi 1,50,000 vel an awm nia hriat a ni a, amah hi pathian ang hiala an ngaih avangin, an kalsan loh tur thu an puang hlawm a, hei vang hian dan leh thupek ken kawhna kawngah pawh harsatna nasa tak thlen theiin an awm a, ram pumah ngaihven a ni.
