CBI Court-in Gurmeet Ram Rahim Singh-a kum 20 lung in tang turin hrem

Pawngsual thubuaia thiam loh chantir, Hindu sakhaw pawl pakhat, Dera Sacha Sauda hotu, Gurmeet Ram Rahim Singh-a chu vawiin khan Special CBI Court Judge, Jagdeep Singh-a’n kum 20 lung in tang turin a hrem. CBI court-in hrem a nih dan tur chungchanga thutlukna a siam hnu khan, kum 50 mi, DSS hotu hi a tap a, Haryana-a Rohtak khawpuia lung inah khung a ni dawn a, he lung in hi sipai sang eng emaw zatin an veng mek a, civil mi te kaltlang theih loh tura siam nghal a ni bawk a, Zirtawpni-a thiamloh chantir a nihna hmun, Panchkula-ah Ram Rahim-a ngaisangtu, mi nuai khat chuang an pungkhawm a ni. Ram Rahim-a ukilte chuan hremna nep zawk a hmuh theihnan court sang zawkah thubuai hi thlen an tum ni a sawi a ni a, CBI erawh chuan DSS hotu hi damchhung lung in tang tura hrem ni se an tih avangin, lung ina tun aia rei a tan theih nan hma an la mek ni a hriat a ni. Ram Rahim-a hi a hriselna endik a nih hnuah lung ina khung nghal a ni dawn a, Zirtawpni khan Panchkula atangin Rohtak-ah helicopter hmanga hruai niin, pindan hrangah nuam sa takin a awm a, he thil avang hian sorkar chuan dem a hlawh hle a ni. Puan tawh angin, Zirtawpni-a CBI court-in Gurmeet Ram Rahim Singh-a, pawngsual thubuaia thiam loh a chantir avang khan Punjab, Haryana leh Delhi-a buaina nasa tak a chhuak a, mi 31 an thih bakah, mi dang 250 vel an hliam a, rel, motor leh thil dang tam tak hal a ni bawk.