Spain ram atanga an ram bung, Catalonia lakhran tuma zalenna puangtu, an tualchhung sorkar President Carles Puigdemont chu nimin khan Belgium-ah a kal a, sorkar humhimna a dil rin a ni. Puigdemont hi Spain sorkar ukilte chuan helna chawk chhuak leh dik lo taka pawisa tam tham tak chheprelh vanga thubuai siamsak an tum thu nimin vek khan an sawi a, Spain Foreign Minister, Alfonso Dastis chuan European Union ramte inkara inhriatthiam tawnna an neih leh, tunlai an boruak hre ve vektu an nih avangin, Belgium sorkarin Puigdemont hi sahimna a pek an rin loh thu a sawi a, Belgium ram hian EU-a ram dang mite tan sorkar humhimna dil a phalsak vang leh Spain ram bung dang, Basque lakhran tumtu pawl hruaitute pawh sahimna a lo pek tawh avangin ram pahnih inkarah hian inhnialna a lo chhuak fo tawh thin a ni.
Spain sorkar chuan Catalonia tualchhung sorkar a thiah hnuah, Catalan sorkar thar tur inthlanna chu December ni 21 hian buatsaih tura tih a ni a, Catalonia lakhran duhtu pawl lian bera ngaih, National Catalan Assembly pawhin inthlan neih tura tih hi an pawm thu an sawi tawh a ni. National Catalan Assembly hi political party a ni lo na in, helai ram bunga cheng mipuite rilru sukthlek kaihruaitu pawimawh ber te zinga mi a ni.
