Canada rama India mi, an chhungkaw zahawmna humna tur nia insawia tualthat, mi 2 chu India rama thawn let a remti. Heng mi pahnih hi unau, kum 72 mi, Surjit Singh Badesha leh kum 67 mi, Malkit Kaur Sidhu an ni a, kum 2000, June thlaa thia chhar, Malkit Kaur-i fanu, Jaswinder Kaur Sidhu-i thihna chungchangah India ram ukilte chuan thubuai siamsak an lo tum tawh thin a ni. India ram ukilte sawi dan chuan, Jaswinder Kaur hian a chhungte hriat lohin pasal-ah rickshaw pu a nei a, Canada rama an pem hnuah a chhungte bulah inpuangin, India ramah a haw leh a, an nupaa scooter-a an inphurh laiin Punjab-a Sangrur khuaah beih an ni a, Jaswinder hi rukbo a ni a, a pasal hi nasa taka sawisak a ni bawk. He thil thleng chungchangah hian mi 7 thiam loh chantir an ni tawh a, an chhui chianna-ah Jaswinder Kaur-i te nupa beitute hi Jaswinder Kaur-i nu leh a patea mi rawihte an ni tih hriat chhuah a ni. Surjit Singh leh Malkit Kaur, India rama thawn let hi Canada Justice Minister chuan kum 2014 khan a lo remti tawh a, he thutlukna hi sut tura ngen a nih hnuah, nikum, kum 2016 khan sut a ni a, nimin khan Canada Supreme Court roreltu pakua te chuan heng mi pahnih hi an thil sual tih avanga an chungthu rel tur leh dinhmun hlauhawma awm lo tura ngaih an nih avangin, India rama rawn thawn hi an remti ta a ni.
