Chakma Autonomous District Council inthlanna tun thla ni 20-a neih tura 18 Fultuli biala Congress Candidate Pu Kali Kumar Tongchongya chuhtu awm lova tlinga Returning Officer in a puan chu Gauhati High Court, Aizawl Bench in tih puitlin rih loh turin a hren sak. Hemi chungchanga MNF Party-in an vuivaina High Court-a an thlen chu vawiin khan High Court Judge, Justice N. Sailo chuan ngaihtuahin an vuivaina chu thutlingah a pawm a, an thutheh luh ngaihtuah zui nan thlaleh, May ni 14 a ruat a ni. Puan tawh angin Member 20 awmna, Chakma Autonomous District Council inthlanna, tunthla ni 20 a neih tur-ah Fultuli biala MNF Candidate, Pu Sunir Tongchongya nomination paper chu endiknaah dik tawk lova hria-in Returning Officer-in a hnawl a, a hnawlna chhan hi amah thlawptu chu Chakma Autonomous District Council hnathawk a nih avang leh sorkar hnathawk te a thlawptuah an \ang thei lo nia hriat vang a ni. He inthlanna neih tura candidate te nomination paper hi Lawngtlai Bawrhsap, Pu N. Chakhai, he inthlannaa Returning Officer ni bawk chuan tun thla ni 5 khan endikin tun thla ni 6 khan Pu Kali Kumar Tongchongya hi chuhtu awm lova thlan tlinah a lo puang tawh a, hei hi pawm thei lovin MNF Party chuan he biala an candidate Pu Sunir Tongchongya hnawl a nihna chhan chu Returning Officer thil tihdan dik lo nia sawiin, Court-ah hian an zualko ta a ni. Puan tawh angin Chakma Autonomous District Council inthlanna neih turah hian rorel lai pawl Congress, MNF, BJP leh Independent ten candidate an dah a, campaign boruak pawh a sang chho \an tawh a ni.
