Mizoram hmun hrang hranga kawngpui a chhiat nasat avanga mipuite thlavang hauh nana MNF Party-in Mizoram puma Total Bandh a huaihawt chu buaina leh harsatna lian tham thleng lovin tihtawp a ni. Bandh hi zing dar 5 a\anga tlai dar 5 thleng awh tur ni mah se, mipui thlawpna an hmuh \hat avangin tlai dar 3 khan tihtawp a ni. Aizawlah chuan, MNF Party mite chu veng hrang hranga hmun remchang laiah an duty hlawm a, heng hmun hrang hrangah hian buaina chhuak palh thei veng turin Police leh Magistrate-te an duty bawk. Bandh neih chhung hian Police hmun pawimawh tih loh chu Sorkar Pisa inhawng a awm lova, zirna inte khar a nih bakah dawr inhawng a awm lova, bandh-in a huam lohte leh phalna neite tih loh chu khawlaiah mipui veivak hmuh tur an awm lo a ni. Bandh hian chanchinbu mi leh a semtu, damdawi in hnathawk, tui sem, bawnghnute sem, P&E Emergency Duty leh damlohna avanga damdawi in pante a huam lova. Thlawhna-a zin turte chu Lengpui \umhmun an pan theih dan tur ruahman a ni a, chhungte hmuak turte pawh kaltir an nih bakah Helicopter hmanga zin tur te, inneih leh chhiatna thila chhuak duhte pawh kawng hawnsak an ni bawk.
MNF Action Committee Chairman, Pu Tawnluia chuan chawhnu dar 2 khan Mizo Hnam Runah thuthar lakhawmtute kawmin, kawng chhe lutuk avanga harsatna tawk mek, mipuite thlavang hauh nana Mizoram puma Total Bandh an huaihawt chu mipui thlawpna an hmuh \hat avang leh buaina leh harsatna awm lova an neih avanga mipui chunga lawmthu sawi nan tlai dar 3-ah Bandh chu tihtawp a nih tur thu a puang a. Mizoram puma thlawptu leh \awiawmtute chungah lawmthu sawiin, Bandh avanga harsatna tawkte hriatthiamna a dil nghal bawk. Pu Tawnluia chuan, Total bandh hi Mizoram pum, Vairengte a\anga Tuipang, Farkawn a\ang Kanhmun inkar khaw tinah neih a nih thu leh kawng chhe lutuk avanga mipuite tuarna a nasat tawh avangin mipui thlawpna pawh an dawng \ha niin a sawi a. Mipuite thlavang hauh turin MNF party chu a ding zel dawn niin a sawi. MNF Senior Vice President chuan, kawngpui chhiat chhan chu eirukna vang liau liau nia sawiin, thuneituten Contractor-te nena Revised Estimate vawi tam tak siam nawn a, kawngpui siamna tur sum chu sum siamna atan an hman \hin vang niin a sawi a, CM leh Contractor-te an inthurual tlat avanga hna an thawh \hat leh \hat loh an enfiah ngam loh avangin kawng hi a chhe ta niin a sawi. Zawhna chhangin Pu Tawnluia chuan, nimina CM, Pu Lal Thanhawla hova Mizoram Road Fund Board \hu khawm chu Total bandh an huaihawt dawn vang mai nia a ngaih thu leh khaw \hat veleh kawng chhia siam \hat nghal a nih tur thu an sawi chu MNF chuan an en zui tur thu a sawi a. MNF sorkar lai, kum 2007 khan Mizoram Road Fund Board hi siam a ni a, kum 2008-ah Congress a sorkar zui a, kum 9 zet hman lohvin an dah nia sawiin, hei hi sorkar-in mipui hnena kawng \ha pek a ngaih pawimawh loh vang niin a sawi.
MNF President, Pu Zoramthanga pawhin tun hnaia chanchinbu pakhatin Aizawl Bawngkawn venga kawngpui zauhna tur ram lak a nih chungchang a tarlan chu an Party-in kawngpui chhia avanga mipui thlavang hauh nana Total Bandh an huaihawt tur tihbuaina atana an tih niin a sawi a. Hemi chungchang hi hun remchang hmasa berah lehkha pawimawh zawng zawng nen chanchinbu mite a la hrilhfiah tur thu a sawi bawk.
Mizorama kawng chhiat lutuk avanga lungawi lohna entirna atana MNF Party-in vawiina Bandh an huaihawt hi District khawpui hrang hrang leh Sub Divisional Hqrs. \henkhatah pawh hman a ni a, Lungleiah pawh tukin dar 5 a\anga vawiin tlai dar 3 thleng khan boruak \ha leh muanawm tak hnuaiah bandh hi neih a ni. Party mi, bandh duty-te chu khawpui chhung, hmun 21-ah an duty a, hemi chhung hian pawn chhuak an awm loh bakah lirthei tlan an awm lova, pisa, zirna in, dawr leh sumdawnna hmun te pawh khar vek a ni. Bandh neih chhung hian Lunglei khawpui kawtthler chu a ruak vek a, Bandh duty bak hmuh tur an awm lo a, buaina chhuak palh thei vengin hmun hrang hrangah Police leh Magistrate duty an awm bawk a ni.
Siaha khawpuiah chuan bandh hi mipuiin an thlawp \ha a, pawn chhuak an awm loh bakah lirthei tlan a awm lova, sorkar pisa, zirna in, dawr leh sumdawnna hmunte khar vek a ni. Siaha District-ah hian Tipa khawpuiah pawh bandh neih a ni a, Aizawla bandh tihtawp hun, vawiin tlai dar 3 khan an titawp ve a ni. Bandh neih chhung hian buaina a chhuak lo a ni.
Lawngtlaiah pawh bandh hi mipuiten an thlawp \ha a, buaina engmah awm lovin vawiin tlai dar 3 khan tihtawp a ni. Bandh neih chhung hian mihring pawn chhuak leh lirthei tlan an awm lo a, sorkar pisa, zirna in dawr leh sumdawnna hmun zawng zawng khar a ni a, Chawnhua Multi Modal Transit Transport Project kawng siamtu office hawn chu bandh duty-ten khar tura an tih hnuah khar a ni a, buaina engmah a chhuak lo a ni.
Serchhip khawpuiah pawh Bandh hi tukin dar 5 a\anga \anin party mite chu khawpui chhung hmun 12-ah an duty a, vawiin tlai dar 3-a tihtawp a nih thlengin buaina leh thil duhawm lo lam chhuak engmah a awm lo a ni. District khawpui dang ang bawkin bandh neih chhung hian mihring pawn chhuak leh lirthei tlan an awm loh bakah pisa leh zirna in te leh dawr te khar vek a ni. Buaina chhuak palh thei vengin Police leh Magistrate te an duty reng a ni.
Champhai District-ah pawh Champhai khawpui bakah khawpui dang tam takah bandh hi tukin dar 5 a\anga tlai dar 3 khan neih a ni a, hemi chhung hian buaina leh thil \ha lo a thleng lova, Police leh Magistrate te \ha takin an duty a ni. Bandh neih chhung hian lirthei tlan leh mihring pawn chhuak an awm lova, dawr, sumdawnna hmun, zirna in pisa te khar a ni a, Champhai khawpuiah chuan Kahrawt vengah mitthi an neih avangin bandh duty-te chuan mitthi vui turte chu an ngaihhna thiam a ni.
Kolasib District-ah chuan Kolasib District Hqrs. bakah Vairengte, Bairabi, Bilkhawthlir leh Kawnpuiah pawh bandh tukin dar 5 a\anga tlai 3 thleng khan neih a ni a, hemi chhung hian buaina leh boruak \ha lo chhuak engmah a awm lo a ni. Buaina chhuak palh thei vengin Magistrate leh Police-te \ha takin an duty a ni. Kolasib khawpui chhungah chuan MNF Party mite hmun 11-ah an duty a ni. Bandh neih chhung hian mihring chhuak leh lirthei tlan a awm lova, pisa, zirna in leh dawr te khar vek a ni.
Mamit District-ah pawh Mamit khawpui bakah West Phaileng, Zawlnuam, Kawrthah leh khaw dang lian deuh deuhah te bandh hi neih a ni a, hmun dang ang bawkin vawiin tlai dar 3 khan tihtawp a ni. Mamit khawpuiah chuan MNF Party mite chu hmun 6-ah an duty a, buaina chhuak palh thei vengin Magistrate leh Police-te an duty bawk a ni. Hemi chhung hian khawi hmun a\ang mahin buaina leh thil \ha lo dang thleng report dawn a ni lo.
Lawngtlai District-a Chakma Autonomous District Council Hqrs., Chawngte-ah pawh MNF Party huaihawtin bandh hi neih a ni a, pawn chhuak leh lirthei tlan an awm lova, dawr, pisa leh zirna inte khar a ni a, mipuiin an thlawp \hat avangin bandh hi chawhnu dar 1 khan tihtawp a ni.
