Sultan Hassanal Bolikiah-a kaihhruai Brunei-ah hian Islam sakhua milin dan thar kalpui a ni dawn a, he dan thar hnuaiah hian mipa leh mipa inkawp leh uire te chu lung-a denhlum tur an ni a, hmeichhia leh hmeichhe inkawp te chu kum 10 lung in tan emaw vawi 40 tianga vuak a hrem a ni dawn a, rukru man te chu an kut tan bun sak-a hrem an ni dawn bawk. Muslim naupang te Islam ni lo sakhaw dang pawm tura thlemtute chu pawisa chawitir emaw lung ina tantir emaw an ni thei dawn bawk a, pawngsual leh Prophet Muhammad-a sawisel tiamin heng dan bawhchhiate hi thi tura an chungthu rel theih a ni bawk a ni, dan bawhchhiate hi kum an la tlin loh chuan tianga vuak an ni dawn bawk.
He dan kalpui a nih tur thu puan a nih hnua hian Brunei mipuite chuan an nunna atana hlauhthawngin hun an hmang a mek a, Sharia dan hi kalpui anih lohna tura an do dal theih loh thu an sawi a, khawvel ram dangte chuan Brunei thil kalpui dan chu mak an ti hle bawk a ni.
Sultan Hassanal hi Brunei Investment Agency hotu a ni a, khawvela hotel changtlung ber te, London-a Dorchester leh Los Angeles-a Beverly Hills Hotel te neitu a ni a, Hollywood lemchan thiam George Clooney leh mi lar dangte chuan heng hotel te hi thlen serh turin mipui te an chah a, TV host Ellen DeGeneres pawhin hemi chungchangah hian hmalain a dodal tura mipuite an thawhchhuah a ngai tih a sawi.
