Zonet zawhna chhangin Principal Secretary Home, Pu Lalnunmawia Chuaungo chuan he thu hi a sawi a, hemi hmalam hian Election Commission leh Chief Electoral Officer te chuan an Camp-a kalchilha Electoral Roll ennawnna neih an rawt a, hei hi Mizoram sorkarin \ha a tih loh thu leh tuna Bru Relief Camp a\anga hruaikir tur awm te hruaikir an nih hnua Electoral Roll ennawnna neih zawk rawtna chu Election Commission-a thuneitu sang ber, Full Commission chuan a pawmpui ta a ni. Hemi bakah hian sorkar laipuiin Bru Relief Camp 6-a Mizoram mi la enfiah loh awm nia sawi enfiah nghal a rawtna pawh Mizoram sorkar rawtna angin Bru Camp-a tuna awm te hruaikir an nih veleha tihzui atan dah a ni. Hetihlai hian Tripura Bru Relief Camp 6-a Mizoram mi awm te Mizorama hruaikir hna chu August ni 14 a\anga \ana September ni 10-a zawhfel tura ruahmanna siam a ni ta a, hei hi tihlawhtling turin tunah hian District hrang hrangah ngawrh taka hmalak mek a ni. Zawhna chhangin Principal Secretary Home chuan Tripura Bru Camp-a Mizoram mi awmte hi Mizoramah kir duh lo pawh nisela Mizoram sorkar chuan a tih tura ruahman zawng zawngte hun ruat dik takah tipuitling turin hma a la dawn niin a sawi a, tun dinhmunah sum mamawh hman tur pawh tun hmalama neihsa cheng vaibelchhe 22 vel a awm bakah mamawh dan a zirin sorkar laipuiin a ngaihtuah zui leh dawn a ni. Hetihlai hian Tripura Bru Relief Camp 6-a an hruaitu, Mizoram Bru Displaced People Forum hruaitute tunhnaia Zonet-in a kawmna chu zanin dar 8-ah Zonet Zawlbuk Channel a\angin tihchhuah a ni ang.
