BRICS Summit-in India leh China inlaichinna siam tha

Ram panga – Brazil, Russia, India, China leh South Africa ram hruaitute inhmuh khawmna, BRICS Summit vawi 9-na, China rama Xiamen khawpuia neih mek chuan tun hnaia Doklam-a ramri chungchang avanga inep, India leh China ram inlaichinna a siam tha thei dawn niin China sorkar media, Xinhua chuan a sawi a, nimin khan kawng hrang hrangah inremna thu an thlung a ni. Puan tawh angin, Doklam atang hian India leh China sorkar sipaite hnuh kir ni tawh mah se, inhmuhthiam lohna a la awm reng nia sawi a ni a, mi thenkhat phei chuan ram pahnih sipaite hi inralringin an la awm reng niin an sawi. He buaina chin fel danah hian India ramin ngaihsan a hlawh hle a, buaina punlun hmaa China chu inremna a siampui theih avangin ram dang hruaituten an fak hle nia hriat a ni. He inhmuhkhawmnaah hian PM, Narendra Modi-a chuan chhiah lak dan kalphung thar, Goods and Services Tax chu India rama ram sum dinhmun tihhmasawnna tura kalphung tihdanglam lian berte zinga mi niin a sawi a, sorkar hnathawh dang – Digital India, Start-Up India leh Make In India te chu ram sum dinhmun nasa taka tihmasawn thei a ni tih a sawi bawk a, Pu Modi-a hian BRICS member-te chu tun aia nasaa thawhho leh tanrual tha a tih thu sawiin, tunlai khawvel inher danglam chak takah hian thawhhona tha neih tluka pawimawh a awm loh thu a sawi bawk. Nimin khan Pu Modi-a hian Russia President, Vladimir Putin-a a kawm nghal a ni. China President, Xi Jinping-a chuan BRIC member-te hi ram inang lo tak tak ni mah se, hmasawnna kawnga intluk tlang tak an ni tih sawiin, khawvela himna leh muanna a awm theih nan rilru inang pu chunga buaina chin fel ho a tul thu a sawi a ni. BRICS Summit-ah hian Pakistan-a mi firfiak pawl – Lashkar-e-Taiba, Jaish-e-Mohammad leh Haqqani Network chuan dem a hlawh hle a, Pu Modi-a chuan mi firfiak pawlte beih let kawngah awmze nei taka thawhho a rawt a ni.