Covid-19 dona Dan thar Mizoram sorkarin ordinance hmanga a hman ṭanah vantlang hmuna hmaituamna vuah lo te Rs.100/-, social distancing zawm lo te Rs. 200/- leh vantlang hmuna chil chhak te Rs. 300/- chawitira hrem theih an ni.
The Mizoram (Containment and Prevention of Covid-19 Ordinance, 2020 hi vawiin (Pathianni) hian Mizoram Gazette ah tih chhuah a ni a, ordinance ah hian Covid-19 laka mipui himna tura mipui khuahkhirhna chi hrang hrang leh chung Dan bawhchhiate hrem dan tur tarlan a ni.
Covid-19 kai emaw, a kai nia rinhlelhte nihna leh chanchin pholang thei, an thlalak leh an chanchinte thuneitute phalna nei lova thehdarhtu chu thla 3 lungin tantir leh Rs.5,000 chawitir thlenga hrem theih an ni.
Phalna nei lova sakhaw thil leh vantlang thila punkhawm huaihawttute leh phalna nei lova State ramri kantute chu Rs.5,000/- chawitir theih an ni.
Quarantine emaw isolation emaw pumpelh tumtute chu Rs.3,000/- chawitira hrem theih an ni a, a hun hmaa quarantine emaw isolation emaw chhuahsan lui an awm chuan Rs. 1,000/- aia tlem lo, Rs.5,000/- thleng chawitir theih an ni ang.
Quarantine-a awm mekte zingah inkaihhruaina zawm lo, midang himna ti derthawng zawnga che te chu Rs. 500/- chawitir an ni ang.
Central leh State sorkarin Covid-19 dona tura inkaihhruaina a siam leh mipui kharkhipna thupek a siam te zawm duh lo chu Rs. 1,000/- chawitir an ni ang.
The-Mizoram-Containment-And-Prevention-of-Covid-19-Ordinance-2020
