Mizoram Sorkarin Health Care Scheme thar a kalpui \anah Sorkar rate bithliah chu Mimal Damdawi In neitu pawlin an pawm theih loh avangin an la in nawr chho zel a, hetih mek lai hian blook bank a\anga thisen lak chhuah danah ruahmanna thar hi sorkarin a siam a ni.
Health Department chuan hun rei tak a\anga lo kalpui tawh thisen mamawhtuten Blood Bank a\anga thisen an la chhuak mai \hin chu thil him lo leh mihring nunna hial atana thil pawi thei nia sawiin ngun taka an ngaihtuah hnuah ruahmanna thar hi duan a ni an ti a, ruahmanna thar chuan damlo thisen mamawhtute tan harsatna a siam loh bakah a him zawk a ni an ti.
Ruahmanna thar ang chuan Aizawl Civil Hospital Blood Bank a\anga thisen lachhuak turte chuan Pisa kai hun chhungin Medical Superintendent emaw Deputy Medical Superintendent emaw hnen a\angin phalna leh hriatpuina lak tur a ni. Pisa kai hun piah lam leh Sorkar chawlhah chuan Casualty-a Medical Officer Duty hnen a\angin phalna leh hriatpuina lak tur a ni. Lunglei Civil Hospital-ah chuan Pisa kai hun chhungin Medical Superintendent hnen a\angin phalna leh hriatpuina lak tur a ni a, Pisa kai hun piah lam leh Sorkar chawlhah On call Doctor emaw staff quarter-a Doctor Senior ber emaw hnenah phalna leh hriatpuina lak tur a ni.
Falkawn-a State Referral Hospital-ah chuan Pisa kai hun chhungin Medical Superintendent emaw Deputy Medical Superintendent emaw phalna leh hriatpuina lak tur a ni a, Pisa kai hun piah lam leh Sorkar chawlhah chuan Casualty-a Medical Officer Duty hnen a\angin phalna leh hriatpuina lak tur a ni. District Hospital dangah pawh Pisa kai hun chhungin Medical Superintendent phalna leh Pisa kai hun piah lamah On call Doctor emaw staff quarters-a Doctor Senior ber emaw hnen a\anga phalna leh hriatpuina lak tur a ni bawk.
Health Department chuan, Hospital-a blood transfusion pe thei tur hian Sorkar enkawl leh mimal enkawl damdawi Inte chu Drugs and Cosmetic Act. 1940 hnuaiah Blood Storage Centre-a pawmpui vek an nih a \ul thu an sawi a, hetiang blood storage centre hi Mizorama Private hospital tam zawkin an nei lo chungin inhriatthiamnain tuna kalphung ang hian kal rih mai zawk a ni an ti.
