May thla-a Parliament inthlanpui neih tura term hnihna chelh chhunzawm tumin chhiah tih tlemna tur leh loneitute tana sum tam zawk theh chhuahna tur ruahmanna lian tham tak tak budget ah hian telh a ni a, kum khata cheng nuai 5 la lut tling lo te chuan an sum lakluh a\anga chhiah pek \hin income tax an pek a ngai tawh dawn lo tih Finance Minister Piyush Goyal chuan a sawi. Prime Minister-Kisan Yojana hnuaiah loneitu tenau te chuan an bank account ah cheng sang 6 an dawng dawn tih a puang bawk a, he ruahmanna kalpuina tur hian sorkar chuan cheng vbc 75,000 a seng dawn a, loneitu ram acre 2 chin aia zim neite chuan an bank account ah kumtin cheng sang 6 an dawng dawn a, hei hi cheng sang 2 zelin \um thuma pek an ni ang.
Sorkar hna leh hna nghet dang ni lo, unorganised sector-a hnathawktu thlakhata cheng Rs.15,000 chin hnuailam lalutte chuan kum 60 an tlin hnuah pension thlatin Rs.3000/- an dawng dawn bawk.
Finance Minister Arun Jaitley chu dam lohna vanga ram danga inenkawl tura US ah a kal avangin Piyush Goyal hi interim finance Minister atana ruat a ni a, budget a pharh takah hian hmarchhak bial tana sum ruahman pawh kum hmasa lam aiin zaa 21 in a pung a, cheng vbc 58,166 ruahman a ni.
Budget pharh paha thu a sawiah Piyush Goyal chuan hmarchhak bialte chuan hmasawnna kawngah bung thar an kai tih sawiin, Meghalaya, Tripura leh Mizoram te chuan Rel service an nei thar dawn a ni a ti a, Brahmaputra lui hmangin, bungraw phur lawng lian hmarchhak bial thlentir tum a ni a ti. Budget pharh takah hian NEC sum hman turin cheng vbc 580 ruahman a ni a, Central Pool of Resources ah cheng vbc 931 ruahman a ni bawk.
