Kar engemawzat chhung chu PM Narendra Modi chu Rahul Gandhi pa, PM hlui Rajiv Gandhi bei zawngin a campaign tawh a, Rajiv Gandhi chu Navy sipai te lawng INS Viraat chu a chhungte nena chawlh hmanga zin nan, a mimal thil-a hmangah a puh hnuah INS Viraat-a Commanding Officer hlui-in heng puhna te hi a dik loh thu a sawi a, Congress party chuan PM Modi zawk hi cheng 744 chawia Air Force thlawhna te ama mimal thila hmangah an puh a ni.
Kum 1984-a Indira Gandhi amah vengtute’n an kah hlum hnuah Sikh mi te lakah mipui an hel a, hetah hian Sikh 3,000 vel thah an ni a, BJP chuan hemi thubuai endiktu Nanavati Commission record-a ziahlan danin Sikh mite bei tura thu petu chu Rajiv Gandhi a ni an ti a, India ram sorkarin ama ram mi te a suatna lian berah an chhal bawk a ni.
BJP thusawi behchhan ber hi a fiah tawk lo hle thung a, kum 2005-a hemi chungchang endiktu, Supreme Court judge hlui Justice GT Nanavati chuan Rajiv Gandhi emaw Congress hotu dang emawin hetiang thu hi an pe a ni tih finfiahna a awm loh thu a sawi a, report-a hmuh theih zawk chu Rajiv Gandhi-an Delhi-a thil thleng a vei zia te, hnam leh hnam te lungrual taka an chenho theih nana hma a lak dan te leh buaina tawhna hmun a tlawh thu te a ni tih a sawi thung.
Congress chuan BJP puhna chu chhang letin Modi chu inthlan hi kum 1951 emaw, 1966 emaw kum 1984 emaw-a neih a ni lovin kum 2019-a neih a ni tih an hrilh nawn duh tih an sawi a, tun huna thil pawimawh te ngaihtuah zawk turin an duh tih an sawi.
