Vawiina an Party Pisa-a thuthar lakhawmtute a kawmnaah Pu Vanlalhmuaka chuan Congress party-in inthlan boruak inlumlet mekah rilru, tisa leh thlarau tichhe thei hmelma awma an hriat thu an sawi chu BJP Mizoram Pradesh chuan an pawm thlap tih sawiin, hei hi Congress Sorkar-in nunphung pangai ang hial a an ngaih leh Chief Minister meuh pawhin tihngaihna a hriat loh eirukna leh zu zawrh mek hi a ni tih chu an pawm dan niin a sawi a, hei hi ram hmasawnna leh mihring nunin nasa takin a tuar niin a sawi. Pu Vanlalhmuaka chuan, Congress Party chu National Party ni chunga Party kalphung hre tawk lovah puhin, National Party-ah reng reng National President thu chu thu tawp a ni a, a hnuaia National General Secretary emaw, National Spokesperson te thupuan chu Party thutlukna a ni \hin tih sawiin, tun hnai khan BJP National President chuan BJP-in thawhpui an nei dawn lo tih a lo puang tawh nia sawiin, MNF Party nen hian NEDA-ah thawk ho mah se, Mizoram inthlanah chuan thawhho an tum lova, NEDA-a an thawhhona chu Democratic Alliance mai a ni a, Electoral Alliance an ni lo tih hre turin Congress Party chu a chah a ni.
BJP General Secretary chuan Mizoramah BJP chuan sorkar thar an siam ngei dawn nia sawiin, an kaihhruaina hnuaiah Pu Lal Thanhawla leh hote hi an tel ve duh a nih chuan thupuar pawleng mai mai buaipui lovin, eirukna leh zu zawrh an sim tur thu te, hmasawnna chauh an buaipui dawn thu te sawiin BJP zawm mai turin a sawm a ni. Chakma Autonomous District Council-a Congress-in an thawhhona an tihtawp chungchang zawhna chhangin Pu Vanlalhmuaka chuan, CADC-a thawk dun tur khan Congress Party hi an sawm lo nia sawiin Congress khan lal loh an hlauh avangin party-a an nihna dah \hain United Legislature Party an din a, an hnuaiah an rawn intulut a, Congress Party hian an thawhhona an tihtawp thu puang tawh mah se, an MDC-te chuan thawhhona hi an la titawp ve lo niin a sawi a ni.
