BJP Mizoram Pradesh, Media Cell Chairman Pu Vanlalhmuaka’n tun thla ni 1-a Guwahati-a Prime Minister Pu Narendra Modi hova hmarchhak biala chhiat tawkte chhawmdawl dan tur sawihonaa Chief Minister Pu Lal Thanhawla a tel lo chuan ram hmangaihtu a nih loh zia leh lalna leh thuneihna chauh duh a nih zia a tilang nia an ngaih thu thuthar lakhawmtute a hrilh a. Heti chunga Sorkar laipui Inter-Ministerial Team-in tuilian vanga Mizoramin harsatna a tawh dan a hmuna an rawn enfiah chuan Sorkar laipui chu a mamawhtute thleng phak sorkar a nih zia a taka tilangtu nia sawiin, tuilian tuarte tana sorkar laipuiin sum a rawn pek chu a nihna tur ang taka hmang turin Mizoram sorkar chu an beisei tih a sawi. Pu Vanlalhmuaka chuan BJP chu Kristian-te tiduhdahtu anga Chief Minister Pu Lal Thanhawla’n a puh leh hlauh tur dik tak chu BJP leh a thuihhruaite an ni tia Mizoram mipui leh Kohhran a chah chu vanduai thlak a tih thu sawiin, hetiang thu belhchian dawl lo hi buaipui tawh lo tura an duh thu a sawi a. Pu Lal Thanhawla chu Chief Minister a nih tawpna chu zahawm taka hmang a, a thil lo tihsual tawhte avanga Mizoram mipui hmaa sual thupha chawi nana hmang zawk tawh tura an duh thu a sawi. BJP Media Cell Chairman chuan BJP thil tum ber chu mirethei leh hnam tenaute humhalh a, tihhmasawn a ni tih sawiin, Orissa-a Kristian Missionary Gramham Stains-te pafa thattu leh Orissa, Madhya Pradesh, Arunachal leh Himachal Pradesh-a Anti Conversion Law siamtu chu BJP ni lovin Indian National Congress nia sawiin, Chief Minister Pu Lal Thanhawla chu thu phuahchawp hmanga BJP bei lo tura an duh thu a sawi bawk.
