Union Finance Minister, Pi Nirmala Sitharaman chuan nimin khan harsatna atanga mipuite khaichhuahna tur puan belhin, hetah hian loneitute, ran vulhtute leh sangha dil siamtute tan hamthatna tur 11 ruahman a ni tih Mizoram BJP hian an sawi a. Covid 19 vanga hun harsatna tawh mek lakah hei hian nasa takin kuthnathawktute a pui dawn a ni, an ti.
Sorkar laipuiin ruahmanna thar a siam zingah hian lo neitute thar chhuah sawngbawlna hmanrua tihchangtlunna tur cheng vbch. nuai 1 te, Micro Food Enterprises tihchangtlunna tur cheng vbch. sing 1 te, sangha khawi leh a kaihnawih atan cheng vbch. sing 2 te, hri lakna ram venna atan cheng vbch. sing 1 leh sang 3 te, ran vulh lama hmasawnna tur cheng vbch. sing 1 leh sang 5 te, ram hmul damdawi chinna leh tih hmasawnna atan cheng vbch. sang 4 te, khuai khawi lama hmalakna tur cheng vbch. za 5 te, thlai leh thei chin kawnga ‘Operation Green’ tihmasawnna tur cheng vbch. za 5 te a tel a. Union Finance Minister-in thil thar a puan zingah hian Essential Commodity Acts, 1995 thlakna tur dan tha zawk te, hmasawnna ruhrel dinna tur chi 8 a puan bakah inawpna lama thil thar 3 a puan te chu lawmawm an tih thu Mizoram BJP hian an sawi.
