BJP beilet tura party hrang hrangten thawhho dan tur an dap chhoh mek laiin, Prime Minister Narendra Modi a’n heng hmalakna te hi a hlawhchham ngei dawn a ni a ti.

Prime Minister Modi chuan eptu party te chu an beidawn em vanga inhlawmkhawm tum an ni em tih chu zawhna pawimawh tak anih thu sawiin, an tum ber chu chhung leh khat induhsak tawnna leh hleprukna thlentir a ni a, BJP erawh chuan sorkar chak tak, kawng engkima hmasawnna thlen thei a din zel dawn a ni a ti. Modi chuan eirukna tibo turin sorkar chak tak din an tum tih a sawi a, eptu pawlte chuan an duh anga eirukna an kalpui theih loh avangin sorkar chak neih an duh lo a, an duh duha an thunun theih sorkar din an tum a ni a ti a, hneh taka eirukna do thei tur chu BJP sorkar chauh a ni a ti.