MNF Party chu BJP a langa thawhpui ngam si lo va, an sum it vanga bechhe ngam si loah Transport Minister Pu John Rotluangliana’n a puh. Vawiina Mamit East Congress Block in Lengpuia vantlang inkhawm an buatsaihah he thu hi a sawi a, MNF party chuan a langa BJP zawmtu nih duh si lovin, an zawm tih an chetziaah a lang vek a ni a ti a. MPC party ten ZPM a an awm tak bawk avangin MNF chuan thawhpui tur an van ta hle a, an tan sorkar siam chu thil harsa tak a ni ta a ni a ti. Pu John Rotluangliana chuan, MNF chu tun thlenga policy mumal sawi tur la nei loah a puh a, an hotute pawhin SEDP an sawi dan pawh a in ang lo fur a ni a ti. ZPM chungchang sawiin Pu John Rotluangliana chuan, ZPM pung thei lo lutuk chu a mangpui niin a sawi a, tun thlengin CM tur pawh an la inhre lo tih sawiin CM tur chiang sa Congress chu an sorkar a rinawm hle zawk a ni a ti. Pu John Rotluangliana chuan, MPC leh ZNP chu an hotu tam takin an tinsak mek nia sawiin, pun lam aiin kiam lam an pan zel a ni a ti a, PRISM pawh an khelh ruk ngar ngar leh an tum ber political party ah an inlet ta a ni a ti bawk. BJP party chungchang pawh sawiin, Pu John Rotluangliana chuan BJP zawmtu tam tak chu sum duh vanga zawm an nih avangin an hotute inkarah hotu nih inchuhna a nasa hle a ni a ti a, tunhnaia Central lam atanga pawisa an dawn pawh an hotu lawk ten inchuhin an Hqrs. ah buaina a chhuah phah niin a sawi a, BJP chu Kristian te ti duhdahtu-ah a puh bawk. Inkhawm hi Mamit East block President Laldawngliana’n a kaihruai a, MPYCC President Dr Lalmalsawma’n thu a sawi bawk.
