Bihar-ah pawh tui lianin zual lam a pan a, mi 98 vel an thi tawh a, district 15-a mi nuai 93 velin harsatna nasa tak an tawk mek. Khaw chin zirtu, Meteorological dept. chuan Bihar chhim lamah chawlhkar khat dang, ruah a la sur a rin thu leh Nepal leh Bihar lamah chuan ruah a sur tlem tur thu sawi mah se, Bihar hmar lamah pawh ruah a la sur nasa hle nia thu dawn a ni a, state Health dept. chuan tui lian avanga thi hi mi 104 vel an tling tawh niin a sawi. State CM, Nitish Kumar, deputy CM, Sushil Kumar Modi leh Chief Secretary, Anjani Kumar Singh chuan Gopalganj, East Champaran, Sheohar leh Sitamarhi district-a tui lian dinhmun hi thlawhna atangin an thlir a, state Disaster Management Dept. Principal Secretary, Pratyay Amrit chuan mi 3,59,000 vel chu hmun him zawka sawn chhuah an ni tawh tih sawiin, mi 2,13,000 chu hmun hrang hranga din, khawsak lailawkna, camp 504-ah dah an ni bawk tih leh, tui lian tuarte tan hian thlawhna hmangin ei tur sem thin a nih thu a sawi a ni.
Chanchin Thar Bihar tui lianah mi 98 thi tawh
