Vawiin khan Biate khaw chawmtu tur, Biate Water Supply Scheme (Pumping) hna thawh mek chu PHE Minister, Pu Zodintluanga’n a tlawh a. East Lungdar leh a chhehvel chawmtu tur, Water Supply Scheme atan pawh sum ruahman fel thuai beisei a nih thu a sawi. PHE Minister chuan cheng nuai 1,364 senga Biate tui lak hna thawh mek hi za-a 23.74 thawh zawh a ni tawh niin a sawi a, East Lungdar Multi Village Water Supply Scheme pawh Project cheng nuai 1,200 senna tur a nih thu sawiin, he scheme hian kum 2039 thleng, East Lungdar, Leng leh Sailulak mipui 6,131 a chawm zo hle dawn niin a sawi. PHE Minister hian cheng nuai riat senga siam, East Lungdar Solid Waste Dumping Ground a hawng nghal bawk.
