Amulya Leona hi Pakistan ram dam reng rawh se tia a au chhuah bakah thu dang sawi leh pawh a tum a, police ten an hruai hrang nghal a ni. Kar hmasa lam khan kum 20 chuang hret mi Amulya hian facebook lamah, India dam reng rawhse tih te, Pakistan dam reng rawhse tih te bakah Bangladesh, Sri Lanka, Nepal leh Afghanistan te pawh dam reng rawh se tih a lo pot tawh a ni. Kanada \awnga a thu post ah hian ram dang te damreng rawhse tia a au chhuak chu chung ramah te chuan a cheng tihna a ni lo tih a sawi a, India rama cheng a nih avangin ram tan hna thawh zel a tum zawk tih a sawi.
Bengaluru-a lungawi lohna lantirna hi ‘Ram danpui humhim rawh’ tih thupui hmanga huaihawt a ni a, hetah hian Hyderabad MP Asaduddin Owaisi pawh a tel a, Amulya in Pakistan dam reng rawhse tih a sawi veleh hian Asaduddin Owaisi leh midang lo awm hnaite chuan a microphone ken lai an lak sak a ni.
AIMIM hotu Owaisi hian engtizawng mahin India hmelma Pakistan chu an thlawp lo tih a sawi.
Amulya-i hi man a ni a, bail a dilna chu court in hnawlin ni 14 chhung Jail-a tang rih turin a thawn nghal a ni.
Karnataka BJP chuan CAA dodalna chu Pakistan leh India ram inpumkhatna duh lotute thawh hona niin an puh nghal a, Owaisi erawh chuan he hmeichhe pakhat leh an party chuan inzawmna a nei lo tih a sawi thung.
