Bawngkawn Brigade-a AMC in Maxi Cab Stand a siam mek chu Mayor PC Lalhmingthanga’n vawiin khan a tlawh. Maxi Cab Stand hi hman theih a peih a nih hunah Maxi Cab te chu khawpui chhunga an din khap a ni tawh dawn a, helai hmunah hian an miphurh te dah felin, helai hmun a tang vek hian passenger te pawh an la tawh dawn a, hei hian khawpui chhung lirthei tawt lutuk a tihziaawm beisei anih thu Mayor chuan a sawi. Pu PC Lalhmingthanga chuan, Maxi Cab dinna tur bik chu zawh fel thawhkhat ni tawh mahse, vantlang inthiarna siam hmabak la nih thu a sawi a, City Bus stand tur pawh Zemabawk lamah ruahman a nih thu a sawi bawk.
Maxi Cab Stand siam nan hian AMC chuan cheng nuai 21 a ruahhman a, meter 292 a thui, Maxi Cab 135 din theihna tur a ni. Mayor hi Dy Mayor Pu Lalringliana leh Councillor dang Pu C Lalmuanpuia, Pu Lalhmingmawia, Pu K Romawia leh Pi B Lalawmpuii ten an tawiawm a ni.
