Aizawl Municipal Corporation-in sorkar a\anga Bawlhlawh paih motor 54 a dawn chu a enkawltu tur Contractor hnenah vawiin khan a hlan. A hlanna inkhawm, Rangvamuala Ch. Saprawnga Truck Terminal-a buatsaihah Aizawl Dy Mayor, Pu Lalringliana chuan, bawlhlawh paih motor 54 hi AMC Ward hrang hrang, Zone 9-a \hena bawlhlawh paih tur an neih dan a zira sem a nih thu a sawi a, hei bakah motor 1 chu Governor Secretariat, Chief Minister Secretariat, Civil Secretariat leh Tuirial Local Council huam chhunga bawlhhlawlh paih nan AMC Sanitation Wing kutah dah a nih thu a sawi. Pu Lalringliana chuan, bawlhlawh paihna motor thar hian tuna Veng hrang hranga bawlhawlh phurh khawm \hin ang zat hi a phur theih beisei a nih thu a sawi a, Contractor-te hian Driver, Handyman leh Diesel leh Petrol an intum ang a, an bawlhlawh paih man chu ni 15 dan zelah pek an ni dawn tih sawiin, an bawlhlawh paih zat pawh Tuiriala Dumping Ground-a AMC duty-ten an lo chhinchhiah zel ang a, an paih zat angin an hlawh tur pawh siam a ni dawn tih a sawi. Pu Lalringliana chuan, tuna bawlhlawh paih motor thar hi December ni 1 a\anga hman tum a nih thu a sawi a, en chhin phawt a nih hnuah a \ul dan anga ennawn zel tum a nih thu a sawi.
Puan tawh angin Mizoram sorkarin khawpui chhung bawlhlawh paihna atan SIPMIU a\angin AMC hnenah October ni 2 khan motor 54 hi a lo hlan tawh a, hengte hi TATA 407 motor 50 leh TATA Xenon motor 4 a ni a, TATA 407 pakhat zelin bawlhhlawh Cubic meter 8 phur thei turin a body hi siam danglam a ni a, TATA Xenon 1 hi bawlhhlawh cubic meter 3 phur thei tura siam danglam a ni bawk. Contractor hi Zothan Auto Works, Aizawl leh TPS Infrastructure Limited New Delhi an ni a, hemi atana sum sen zawng zawng chu Rs. 10,70,06,290 a ni.
