Bangladesh PM Sheikh Hasina chuanna rel, kum 1994-a beih chungchang thubuai kal zelah Bangladesh Court-in eptu lam thlawptu mi 9 thi turin an chungthu a rel sak.

Hasina hi kum 1994 khan eptu lam hruaitu a ni a, a chuanna rel hi bomb hmanga beih a nih hnuah, a beitute hian silaiin an kap zui a, mi eng emawzat an hliam a, Hasina tak hi chu a him thung a ni. Bangladesh-a eptu party lian ber, Bangladesh Nationalist Party, BNP chuan court thutlukna hi an pawm loh thu leh politics thilin a thunun nia an ngaih thu an sawi a ni. He thubuai kaihhnawihah tho hian nilaini khan court chuan midang 13 chu lung ina kum 10 tang turin an chungthu a lo rel tawh bawk a ni. BNP Secretary, Jahirul Islam chuan thiam loh chantir tak te hi an party hruaitute vek an nih thu a sawi a, inbeihna pawh hi politics thila inbeihna atana phuahchawp a nih thute leh sorkar lai party-in an elpui party nuai chimih a tumna a nih thu te a sawi bawk a ni.