Corona Virus tia hriat lar bawk, hri a len lohna tura beihpui thlak chhunzawm zelah, Tlabung khaw chhunga screening point pahnih chu nimin atang khan khar rih a ni a, ramri dep leh zual Kawrpuichhuahah screening point chu ngawrh zawka vil a ni.
Tlabung damdawi ina Ayush building-a isolation ward, he hri kai rinhlelhawmte bik dah hran lailawkna turah chuan tun dinhmunah khum pathum dah a ni a, mi dangin an chim buai loh hmun fianrial a nih a tul avangin, isolation ward awmna Ayush building pumpui chu thawktute tih loh, pawn lam mite tan tlawhpawh theih loh tura khar rih a ni bawk.
Hetih lai hian, Mizoram hmun dang zawng aiin, Tlabunga Sub-Divisional Hospital-ah hian thawktu an indaih loh lehzual tih, Tlabunga Zonet reporter chuan sawiin, medical officer pangngai pawh panga an neih thin laiin, tun dinhmunah chuan medical officer thawklai pakhat chiah an nei tawh niin a sawi a, thawktu dang pawh nasa taka an indaih loh sa avangin, screening point kalpui a nih avang hian damdawi inah thawktu an indaih lo lehzual hle niin a sawi.
