Nizana Khawthlangtuipui Group YMA thutkhawmnaah, tunhnaia Bangladesh dinhmun enin ngaihngam taka awm theih a ni tawh lo tih an sawi a, thenawm ram atanga Covid-19 vei rawn luh tum an awm palh a hlauhthawnawm a ni an ti a, an hnuaia YMA branch hrang hrangte chu ramri dep lehzual, ram pahnih inrina thirlen hung pawn lama riak thei tur mi tlawmngai lo thlang turin an inhriattir a ni.
Ruahman lawk ang chuan YMA Tlabung Branch member thlanchhuahte chu Tababagh chhehvela ramri hung pawn lamah an inkhuar ang a, Zodin Branch YMA member-te chu Bindasora chhehvel tuam tura tih an ni a, Chawnpui Branch YMA member-te chuan Kawrpuichhuah leh Tippreghat lam tuamin, Chawilung ‘S’ Branch-in Bornasury leh a chhehvel an veng thung dawn a ni.
