Khawthlangtuipui Group YMA hmalaknaa India leh Bangladesh inrina dep lehzual hmun hla zawka duty tur hian, YMA branch hrang hrangin tlawmngaia duty tur an inruat theuh a, vawiina riahbuk an sualna tur hmun an pan hma hian, anmahni branch theuh hruaituten thlahna hun tawi an hmanpui hnu-ah, Khawthlangtuipui group YMA hruaituten an vailiam a ni.
Tlabung leh a chhehvela ram pahnih inrina venhim hna hi hripui len tantirh atang khan, heng lai khuaa mi tlawmngaiten ngawrh takin an lo kalpui tawh a, nimahsela tun hnaiah Bangladesh-ah Covid-19 vei leh thihpui an pun chak zel avangin, ramri hrul lehzual hmun hla zawkah rami kan turte ven hna ngawrh lehzuala thawh a tul nia ngaiin, ramri hrul hmun hla zawkah an inkhuar dawn ta a ni.
YMA, Tlabung branch chuan ramri-a riak chhuak tur hian kum 45 chin chunglam, ruihtheihthila filhlim nia an hriat thlang chhuakin, heng mite thlahna hun tawi, YMA Runa an buatsaih chu bialtu MLA Pu Nihar Kanti Chakma bakah, Tlabung SDO (C) Pu Lalsanglura leh SDPO Pu Lalrinpuia Chenkualten an hmanpui a, bialtu MLA hian tanpuina tangkafai Rs 13,000 a hlan bakah, professional NGO Cod-Nerc chuan Rs 10,000 hlanin, PPE Sitchers Group Tlabungin hmai tuamna an indaih tur an hlan bawk.
Khawthlangtuipui Group YMA hnenah hian, Mizoram Chief Minister Relief Fund tling khawm atangin cheng nuai 2 hlan a lo ni tawh a, tanpuina tangkafai an dawn te hi Khawthlangtuipui Group YMA chuan an hnuaia YMA branch hrang hrang bakah, an chhehvela YCA hnenah ramri ven hna thawhna atana hman turin an hlan veleh a ni.
