Bairabi South Ramthar Veng Anganwadi Centre II chu Tlawng kama a dinna lei, nasa taka a chet avangin nimin, Pathianni khan hnatlangin mipuiin an thiat. Bairabi Chhim Veng VCP, Pu H. Zirsangliana hnen atanga thu dawn danin he Anganwadi Centre dinna lei hi Tlawng lui tui lianin a hreuh avang leh, a min chhunzawm zel avangin a ruang hlawm theih lohin Tlawng luiah a tlu lut thei mai dawna hriat a ni a, hei vang hian VC chuan hnatlang koin thiah a ni ta niin a sawi a, a sakna hmanrua te chu lak khawma dah that a nih thu a sawi. Hemi hma lam hian he Anganwadi Centre II dinna, Tlawng lui kam lei hi tui lianin a hreuh zel avangin harsatna an tawk tih Deptt. hotute an lo hrilh tawh a, hmun hima sak that a nih hmain thiat ngai khawpin a awm zui ta niin a sawi a ni. He Anganwadi Centre chhehvela mimal in 5 vel pawh tunah hian dinhmun hlauhawmah a awm mek niin a sawi a, PWD Bangla panna kawng pawh Tlawng lui kuang zau zel hian a thleng tep tawh niin a sawi bawk.
